Tragjedia në Vlorë, ku humbën jetën nënë e bir ka marrë tjetër rrjedhë. Në fakt, ata nuk kanë vdekur aksidentalisht, por janë vrarë qëllimisht nga persona të paidentifikuar ende.
Fillimisht u mendua se zjarri në banesën e tyre një katëshe kishte rënë nga shpërthimi i një bombole gazi, madje u tha se mund të ishte shkaktuar nga një cigare, por të dhënat e para dëshmojnë të kundërtën.
Mësohet se në dy trupat e djegur janë gjetur shenja dhune, pasi djalit i janë gjetur shenja në kokë, ndërsa nënës së tij në qafë.
Gruas 73-vjeçare, Selkie Hoxhallari dhe djalit të saj 43-vjeçar Novruzit po u bëhet një ekzaminim mjeko-ligjor më i thelluar për të zbuluar nëse janë vrarë para se banesës t’i vihej zjarri.
Trupat e tyre janë gjetur të djegur në banesë nga të afërm, njëri prej të cilëve deklaroi për News 24:
“I gjetëm dy trupat e karbonizuar, në trupin e Novruzit u gjet edhe një cigare,” ka deklaruar ai duke shprehur gjithashtu situatën tragjike në momentin e kontrollit në banesën e djegur.
Ngjarja ka ndodhur pranë “Pyllit të Sodës” rreth orës 4 të mëngjesit.
Njoftimi i policisë:
Vlorë Informacion paraprak Më datë 21.01.2018, rreth orës 04:20, në lagjen ”1 Maji”, në një banesë ka rënë zjarr e për pasojë janë djegur dhe kanë ndëruar jetë dy shtetas. Nga veprimet e para të kryera nga grupi hetimor dyshohet se zjarri në banesë mund të jetë shkakëtuar aksidentalisht , ku për pasojë janë djegur e kanë ndëruar jetë nënë e bir, shtetasit S.H., rreth 73 vjeçe dhe N.H., rreth 43 vjeç. Trupat e pajetë janë transportuar në morgun e Spitalit Rajonal Vlorë. Grupi hetimor po vijon punën për zbardhjen e plotë të rrethanave të ngjarjes.
