Zbardhet shkaku i ngjarjes së rëndë që ndodhi pasditen e së dielës, ku 23-vjeçari Aldison Belulaj vrau Arielën dhe më pas qëlloi me armë zjarri veten.
Policia ka dhënë detaje rreth shkakut të ngjarjes, zbardhur nga dëshmitë e të afërmve të vajzës dhe djalit. Policia ka zbuluar se Ariela ka qenë e lidhur prej 4 vitesh, ndërsa çifti është ndarë para 2 muajsh, në nëntor. Mësohet se Ariela ka vendosur t’i japë fund lidhjes, por kjo gjë nuk është pranuar nga Aldisoni.
Veç kësaj, një tjetër fakt që ka shtyrë Aldisonin të kryejë krimin e rëndë, është se kohët e fundit, ka nisur të shoqërohet me një person tjetër. Madje, 21-vjeçarja ka ndërruar edhe numrin e telefonit, duke mos i lënë asnjë mundësi kontakti Aldisonit, raporton Tirana Today.
“Nëse s’do kem një kontakt me të, do e vras”, kështu mësohet se u ka thënë Aldisoni të afërmve të vajzës.
23-vjeçari ka ardhur në Tiranë duke e ndjekur, derisa është takuar me të pikërisht në vendin e ngjarjes së rëndë. Ariela ka qenë e shoqëruar me motrën dhe me kushërirën e saj. Aldisoni ka tentuar të bisedojë, prandaj vajzat janë mënjanuar dhe i kanë lënë vetëm që të sqarohen.
Më pas, mes tyre ka pasur debat, por të afërmet e Arielës nuk kanë arritur të dëgjojnë bisedën mes tyre, pasi ndodheshin më tutje. Ato kanë parë Arielën në gjunjë duke iu lutur ish-të dashurit që të mos e vriste:
“Mos më vrit”, i është përgjëruar Ariela, por Aldisoni ka shtënë me armë, ndërsa plumbat e kanë kapur atë në këmbë, dorë dhe në kokë. Kjo e fundit ka qenë goditja fatale për 21-vjeçaren.
Ngjarja nuk është filmuar nga asnjë kamera sigurie, detajet janë zbardhur nga dëshmitë e personave. TIRANA TODAY
