Zbardhen të tjera detaje lidhur ekzekutimin mafioz të Devi Kasmit. Ky i fundit mësohet se ruhej, teksa duket se ishte në dijeni të një atentati të mundshëm, ndërsa vrasësi kishte një javë në ndjekje të tij.
Mësohet se nga pamjet filmike të sekuestruara të objekteve pranë palestrës në pronësi të Devi Kasmit, janë parë të qarkullojnë dy persona me motor, ndërsa viktima bënte lëvizje të kufizuara dhe lëvizte i armatosur.
Mario Meshini, 25 vjeç është personi i parë i ndaluar, i cili dyshohet se është i përfshirë në vrasje. Në procesverbalin e OPGJ thuhet se akuzohet për vrasje me paramendim dhe armëmbajtje pa leje, por avokati i tij ka mohuar akuzën, teksa deklaroi sot se Meshini dhe Kasmi ishin miq prej kohësh dhe se ai ka qenë i pranishëm në vendin e ngjarjes.
Avokati i Mario Meshinit, personit të ndaluar si i përfshirë në vrasjen e Devi (Dëfrim) Kasmit, ka folur për News 24, ku ka hedhur akuza të rënda ndaj Policisë së Shtetit.
Nga detajet e dhëna nga avokati i Meshinit, ngjarja merr një tjetër rrjedhë, teksa avokati shprehet se Mario ka qenë mik i ngushtë i viktimës Kasmi.
Avokati është shprehur se Meshini i ka bërë një mesazh Kasmit, i cili ka dalë nga banesa e tij, ndërsa një tjetër person është afruar me armë zjarri dhe ka vrarë 41-vjeçarin. Më pas, shprehet avokati, autori i ka drejtuar armën edhe Mario Meshinit, por më pas është larguar.
Meshini ka shkuar në shtëpi i tronditur nga ngjarja, ndërsa avokati shton se policia e di se kush është autori i vrasjes, por ngurron ta kapë atë.
Rrëfimi i avokatit të Mario Meshinit:
“Meshini u mor në pyetje si person që ka dijeni me ngjarjen. E mori në telefon dhe u takuan jashtë banesës, i ka shkruar më saktë.
Ka qenë në vendin e ngjarjes, është shok me viktimën, vrasësi ka ardhur dhe ka qëlluar mbi viktimën. Më pas i ka drejtuar pistoletën, por Meshini i ka thënë që nuk ka lidhje me të.
Vrasësi është larguar, më pas Meshini ka shkuar në shtëpi i tronditur, në titra ka parë lajmin. Nuk është se e njihte vrasësin, nuk ka asnjë lidhje me të. Çdo gjë është e filmuar. Në ngjarje kanë qenë edhe dy infermierë që kanë qenë dëshmitarë, përse nuk ndalohen edhe ata?
Nuk shkoi në polici sepse ishte i tronditur. I ka thënë të gjitha në mënyrë të detajuar.
Policia ngurron të kapë vrasësin, e ka emrin. Çështja po fryhet për të mos u vënë në pranga autorët e vërtetë të kësaj ngjarjeje”, tha avokati i Meshinit. TIRANA TODAY
