Prokurorja Rovena Gashi ka paditur sot Prokuroren e Përgjithshme, Arta Markun.
Gashi ka bërë një kallëzim pranë Gjykatës Administrative, ndërsa ka kërkuar rikthimin në detyrë si drejtuese e Njësisë së Dekriminalizimit, pasi sipas saj, shkarkimi i saj është i lidhur me propozimin që ka bërë për ndërprerjen e mandateve të Rehovicës dhe Rakipit.
“Vendimi për lirimin tim është absolutisht i pavlefshëm. Të pezullohet vendimi i lirimit si Drejtore e Marrëdhënieve me Jashtë. Prokurorja e Përgjithshme e Përkohshme ka uzurpuar kompetencat e Këshillit të Larte të Prokurorisë. Lirimi nga detyra është bërë pas kërkesës për ndërprerjen e mandatit për Aqif Rakipin dhe Gledion Rehovices,” thuhet në padinë e Gashit drejtuar Gjykatës Administrative.
Por, cila është prova që Gashi mund të përdorë kundër kryeprokurores Marku?
Gazetarja Klodiana Lala zbardh për “BalkanËeb” argumentet me të cilat Gashi pretendon të rrëzohet vendimi i Arta Markut.
Sipas Gashit, vendimi i marrë nga Marku është i pabazuar në ligj, ndërsa argumenti kryesor që pritet të përdorë për mbrojtjen e saj është një bisedë e zhvilluar në zyrën e Arta Markut në prani të dy drejtuesve Adnand Gjoni dhe Thoma Jano.
Sipas BalkanËeb, gjatë kësaj bisede Arta Marku i ka kërkuar llogari Gashit për kërkesën e depozituar prej saj në KQZ, ku kërkonte heqjen e mandatit të dy deputetëve Aqif Rakipit të PDIU-së dhe Gledion Rehovicës së LSI-së.
Në prani të Adnand Gjonit dhe Thoma Janos, kryeprokurorja mësohet t’i ketë thënë: “Nuk je konsultuar me mua para se të dorëzojë kërkesën për dy deputetët në KQZ”.
Madje një gjë të tillë, zonja Marku e ka konsideruar shkelje të etikës.
Sakaq, Gashi argumenton se në këtë rast ka vepruar konform ligjit, pasi KQZ-ja e pranoi kërkesën e saj, duke kërkuar kështu anulimin e vendimit të Markut për shkarkimin nga detyra.
