Banesa e një mësueseje në Himarë është grabitur nga disa persona, të cilët kanë marrë dje gjatë natës një gomone.
Policia ka zbardhur detaje të reja, teksa njofton se grabitësit kanë lënë edhe një shënim pak pa u larguar.
Ngjarja ka ndodhur në fshatin Ilias të Himarës, ku persona ende të paidentifikuar janë futur në banesën e çiftit L.N. dhe Ll.N, dhe veç sendeve e materialeve me vlerë që kanë gjetur në shtëpinë e tyre, kanë marrë edhe mjetin lundrues.
Pas grabitjes, autorët kanë lënë në parmakun e dritares një letër, ku shkruhej: “Ta hapëm shtëpinë me çelësin e portës, por nuk morëm gjë. Donim gomonen të bëhemi me lekë”.
Çifti jeton në Tiranë, prandaj, natën e grabitjes në banesë nuk ka qenë asnjë nga familjarët prezentë.
Grabitja është konstatuar vetëm rreth orës 07:00 të së enjtes nga babai i arsimtares, i cili jeton në një tjetër banesë në fshat dhe ka lajmëruar menjëherë policinë.
Pasi kanë grabitur çfarë kanë mundur në brendësi të saj, ata janë larguar duke marrë edhe mjetin lundrues tip gomone që ishte i vendosur në një karrel. Dyshohet se gomonia është tërhequr me një automjet, ose mund të ketë dalë menjëherë në det të hapur.
Mësohet se do të verifikohen kamerat e sigurisë së disa subjekteve në afërsi të fshatit, për të konfirmuar nëse mjeti lundrues është ngarkuar apo tërhequr nga ndonjë mjet tjetër në rrugë tokësore, apo nëse gomonia ka dalë direkt në det.
Gomonia ishte rreth 6 metra e gjatë, me ngjyrë të bardhë dhe dy motorë, 115 kuaj fuqi dhe 8.8 kuaj fuqi. Çifti i dëmtuar i ka vënë në dispozicion policisë disa foto të mjetit të vjedhur, të shkrepura gjatë tyre në muajt e verës. Policia bëri të ditur se është një mjet që mund të përballojë detin drejt shtetit fqinj. Dyshohet se autorët e grabitjes janë banorë të zonës, të cilët kanë qenë në dijeni të gomones në banesën e çiftit që jeton në Tiranë.
