11 shqiptarë janë kapur brenda një kamioni, gjatë një kontrolli në Holandë. Shtetasit shqiptarë të kapur nga policia janë të moshës 19 deri në 32 vjeç. Gjatë kontrollit, policia u mbështet nga brigada e zjarrit në Roterdam.
Kontrolli u mbajt në një hapësirë pranë trageteve në Vlaardingen, në një zonë ku kamionët largohet me traget drejt Mbretërisë së Bashkuar.
Kështu, emigrantët hyjnë në kamion me shpresën se mund të arrijnë në ‘tokën e premtuar’. Pasi kapen, emigrantët dërgohen në Departamentin e Policisë së Huaj, të Identifikimit dhe Trafikimit Human.
Policia ka përdorur dy qenë të trajnuar për kapjen e refugjatëve, me anë të aromës së njeriut. Kur ata ndjejnë aromën e një njeriut, qentë ulen në tokë dhe lehin vazhdimisht.
Shtetasit e kthyer nuk do lejohen të hyjnë në Bashkimin Evropian për 2 vjet. Aktualisht ata ndodhen në paraburgim, ndërsa u është marrë dëshmia edhe shoferëve të kamionëve./ TIRANA TODAY
