Zbardhen detaje të reja lidhur me gjetjen e 250 mijë eurove të padeklaruara në aeroportin e Rinasit.
Shtetasi izraelit, të cilit iu gjet shuma e konsiderueshme, kishte ardhur nga Moska në Tiranë. Ai ka deklaruar para policisë se paratë i duheshin për të hapur një klinikë dentare dhe se këtu e prisnin dy persona, emrat e të cilëve nuk rezultojnë korrektë dhe për të cilët policia ka kontrolluar celularin e izraelitit.
Efim Reichman, 49 vjeç, u ndalua gjatë një kontrolli nga Policia Kufitare në bashkëpunim me Doganën e Rinasit, pasi iu gjetën paratë e fshehura. Por, vetë Reichman është justifikuar teks a tha se nuk e dinte që paratë duhej të deklaroheshin, megjithëse limiti i parave që mund të mbahen cash pa u deklaruar, nuk duhet të kalojë 10 mijë euro.
Ndërkohë, tashmë Policia e Shtetit ka nisur një procedim penal në gjendje të lirë për shtetasin izraelit, i cili akuzohet për “Mosdeklarim në kufi të të hollave dhe sendeve me vlerë”.
Por, tashmë Reichman po hetohet edhe për pastrim parash. Megjithatë, deri në përfundim të hetimeve paratë do mbahen të sekuestruara.
