28-vjeçari Gent Cakaj, i refuzuar në mënyrë kategorike të dekretohej nga presidenti Meta për tre motive, do të përfaqësojë diplomacinë tonë. Me delegimin e kompetencave, përpos reagimeve politike mbi lëvizjen e Ramës, po diskutohet edhe pjesa proceduriale, për shkak se disa konstitucionalistë gjykojnë se kryeministri “shkeli betimin Kushtetues”.
Kjo pasi u betua edhe si ministër, e menjëherë ia kaloi kompetencat zëvendëministrit. I pyetur mbi “delegimin e kompetencave”, presidenti Meta reagoi në mënyrë të përmbajtur, teksa përmendi Kushtetutën, dhe nga ana proceduriale e kishte të pamundur të mbante qëndrim për zgjedhjen e Ramës. Përplasja institucionale që më pas kaloi edhe në personale Rama-Meta, ka përfunduar me një ministër me “autorizim”.
Nëse kthejmë kokën pas, kujtojmë se kreu i shtetit refuzoi vetëm kandidaturën e Gent Cakajt, duke e argumentuar me tre arsye; Cakaj nuk kishte eksperiencën e duhur; ishte shprehur në favor të korrigjimit të kufijve në Ballkan, që binte ndesh me politikën e BE-së dhe SHBA-ve; kishte punuar si zëvendësministër i Jashtëm, pa u pajisur me certifikatë sigurie.
Që të trija arsyet, Meta i shoqëroi me referime ligjore dhe kushtetuese, duke refuzuar përfundimisht të dekretonte Cakajn si ministër për Europën dhe Punët e Jashtme. Kryeministri Edi Rama vendosi të marrë vetë edhe postin e ministrit të Jashtëm pas refuzimit që i bëri presidenti Ilir Meta kandidaturës së Cakajt, por vetëm një ditë pasi u betua si ministër, ia kaloi kompetencat të përzgjedhurit të tij të mëparshëm.
