Dalin detaje të reja lidhur me vrasjen e ndodhur në ish-Bllok, ku mbeti një i vrarë dhe dy të plagosur. Në dosjen e Prokurorisë renditen disa akte ekspertimi, një për të cilëve konfirmon se një gëzhojë e gjetur në vendin ku u vra Fabian Gaxha, është shkrepur nga një armë, që është përdorur edhe në një plagosje në Tiranë.
“Akt nr. 10643, datë 09.10.2018, ekspertimi balistik krahasues, konkluzion: Një gëzhojë me markerimin ‘Geco 9 mm Luger’ e sekuestruar në këqyrjen e vendit të ngjarjes së vrasjes së shtetasit Fabian Gaxha, si edhe plagosjes së shtetasve Eljon Hato dhe Ervis Martinaj, në Tiranë më datë 04.10.2018, është qitur nga e njëjta armë zjarri që ka qitur tre gëzhoja (nga 6 gjithsej) të sekuestruar në ngjarjen ‘Konflikt në loto sporti’, ndodhur në Tiranë, më datë 26.09.2017”.
Kjo plagosje ka ndodhur në rrugën :Bardhyl” në kryeqytet, ku mbeti i arrestuar një shtetas, ndërsa disa të tjerë janë shpallur në kërkim. Për këtë ngjarje, Policia e Tiranës pati arrestuar shtetasin Sandër D. 38 vjeç, (i dënuar më parë), i cili është kapur në flagrancë në vendngjarje me armë zjarri të llojit “Beretta”.
Nga plagosja, u shpall në kërkim pronari i lokalit, shtetasi K.S., 44 vjeç, banues në Tiranë.
“Këta dy shtetas më datë 26.09.2017, rreth orës 22:10, në rrugën ‘Bardhyl’, në lokalin (baste sportive në pronësi të shtetasit K.S.) janë përfshirë në një konflikt për motive të dobëta me shtetasit G.S., 35 vjeç, E.O., 35 vjeç (i dënuar më parë), Sh.F., 32 vjeç, E.B., 36 vjeç dhe O.Xh., 46 vjeç. Si pasojë e konfliktit të ndodhur shtetasi S.D. ka qëlluar në ajër me armë zjarri të llojit ‘Beretta’”, deklaronte vjet Policia.
