Dështojnë negociatat me ndërmjetësimin e McAllister, Fleckenstein dhe ambasadorit amerikan Donald Lu, mes mazhorancës dhe opozitës, për t’i dhënë fund krizës politike.
Mësohet se gjatë diskutimeve, drafti, i cili duhet të përmbante krijimin e një qeverie teknike nuk ka ekzistuar dhe, për këtë arsye, Basha është larguar nga takimi.
Gjithashtu, bëhet me dije se negociatorët ndërkombëtarë kanë propozuar që kryetari i KQZ-së të drejtohet nga opozita, si shenjë besimi për menaxhimin e procesit zgjedhor.
Një tjetër pikë e propozuar ishte “kriminalizimi i shitblerjes së votës”, pra, ashpërsimi në Kodin Penal i masave për persona që ushtrojnë presion, blejnë, shesin votën e tyre dhe të të tjerëve.
Sakaq, Rama ka rënë dakord që të shtohet numri i vëzhguesve të zgjedhjeve, por s’ka pranuar qeverinë teknike. Por, Basha nuk ka pranuar të negociojë me të dhe është larguar nga Pallati i Kongreseve.
Pas largimit në një prononcim për mediat, kreu i PD theksoi se akoma nuk ka negociata midis palëve, por çdo gjë është në proces për të arritur në një pikëtakimi midis palëve, pikëtakim që do jetë shumë i vështirë për t’u arritur.
Ndërsa zëvendëspresidenti i Partive Popullore Evropiane, David McAllister dha një mesazh të qartë të dështimit të negociatave, kur i uroi të gjithëve: Natën e mirë!
