Ish-futbollisti i Juventusit, që drejtoi për pak kohë ekipin e Partizanit është përfshirë në një skandal të madh të ndodhur në qytetin e Latinës. Trajneri Mark Iuliano pas dështimit me ekipin e Partizanit, u kthye në Itali dhe ishte në pritje të ndonjë oferte më të mirë për të vazhduar rrugëtimin e tij, por nuk ndodhi kështu. Por në vend të ofertës, atij deri tani i ka mbërritur vetëm një kërkesë për deponim nga Prokuroria e Latinës, e cila e ka marrë në pyetje rreth skandalit që ka shpërthyer së fundmi në këtë qytet.
Iuliano hetohet për periudhën kur ka qenë trajneri i skuadrës së Latinës, ish-presidenti i të cilës, Paskuale Maieta, është arrestuar pasi akuzohet se në bashkëpunim me grupe kriminale përdorte klubin për të pastruar qindra miliona euro.
Edhe vetë Iuliano kishte qenë i përfshirë në mënyrë indirekte në këtë skemë, duke përdorur apartamente shtetërore gjatë qëndrimit në drejtimin e këtij klubi në vitin 2015, të cilat administroheshin nga Maieta, ish-deputet italian, i cili më pas regjistronte pagesa false për të pastruar para.
Iuliano është marrë këto ditë në pyetje nga Prokuroria, ndërsa janë publikuar edhe përgjimet telefonike ku ish-trajneri i Partizanit shfaqej i shqetësuar pas kontakteve që kishte pasur me policinë, ku ishte pyetur rreth kësaj çështje.
