Ish-deputeti Eduart Ndocaj, ose siç e njohim edhe si “Kaubojsi” ka lënë pas krahëve politikën, duke u përkushtuar me kohë të plotë pasionit të tij për pikturën. Politika dhe piktura kanë ecur mjaft mirë gjatë rrugëtimit të tij, e pas përballjeve të forta në Kuvend e jo vetëm, duket se tablotë plot ngjyra nuk e kanë tradhtuar e lënë në mes të rrugës.
Tek skicat ai gjen vetveten, mbushet plot shpresë, gjë të cilën nuk e gjeti fort tek klasa politike, për të cilën pati shumë “brryla”. Kur bën një pasqyrë të përgjithshme të asaj çfarë ai ka postuar në Instagram, të jep ndjesinë se ka një të përbashkët me kryeministrin Rama, ose “Piktorin”, siç e thërrasin me ironi kundërshtarët e tij politikë.
Ky i fundit, sapo gjen pak hapësirë të lirë, përvesh mëngët për të gjetur qetësi tek pikturat e tij. Jo në pak raste, ai ka ndarë edhe me ndjekësit foto me Zahon, teksa “shkarravit” diçka.
Të gjithë njohin si profesionin e tij pikturën, edhe për faktin që kryeministri i Shqipërisë është diplomuar për pikturë në Akademinë e Arteve të Bukura, sot Universiteti i Arteve.
Pavarësisht impenjimeve si kryeministër, asnjëherë nuk e ka lënë pas dore pikturën, teksa kohë pas kohe gjen hapësira të mendojë edhe për ekspozitat e tij, madje tashmë jashtë kufijve.
Ndryshe nga ai, Ndocaj ka guxuar edhe më shumë, duke paraqitur para publikut të gjithë arsenalin e tij në këtë zhanër.
