Deputeti demokrat Luçiano Boçi ka denoncuar një skandal, ku mësuesit duhet të paguajnë 2.000 lekë të reja për të marrë një kredit për një seancë trajnimi.
Në një postim në Facebook, Boçi shkruan se një mësuesi i duhen disa kredite të tilla, ndërsa kjo është një vjedhje që po bëhet nga fondacione fantazmë, por që kanë licensimin e ministrisë për të grabitur mësuesit.
“Me demek sipas premtimit, do të bëheshin falas dhe nga institucione të kualifikuara. Këto “indulgjenca”, mësuesit më pas i fusin në dosjet e kualifikimit, në përpjekjet e tyre të mundimshme për të ruajtur atë të shkretë vend pune!”, shkruan ndër të tjera deputeti demokrat.
Postimi i plotë:
ZHVATJA E MËSUESVE
Mësuesit megjithëse janë pa kontratë kolektive, d.m.th pa siguri në punën e tyre, zhvaten sistematikisht nga Ministria e Arsimit.
Detyrohen të blejnë kredite, si në rastin e treguar më poshtë, me një letër bakalli, nga fondacione e organizma fantazmë që nuk kanë as faqe ëeb e jo më profesionalizëm.
Por ama që kanë liçencimin dhe viston e ministrisë për të grabitur mësuesit.
20.000 mijë lekë duhet të paguajë mësuesi që të marrë një kredit të vetëm për një seancë trajnimi. I duhen disa të tilla.
Me demek sipas premtimit, do të bëheshin falas dhe nga institucione të kualifikuara.
Këto “indulgjenca”, mësuesit më pas i fusin në dosjet e kualifikimit, në përpjekjet e tyre të mundimshme për të ruajtur atë të shkretë vend pune!
Rraskapitje, zhvatje dhe tallje.
Kjo është reforma në arsim.
