Ambasada e Britanisë së Madhe në vendin tone, ka reaguar në lidhje me vendimin e sotëm të GJKKO, ku u dënua me 2 vite burg, ish-Kryeprokurori i Përgjithshëm, Adriatik Llalla.
Ambasada e ka mirëpritur vendimin, teksa shton se nëse ka vullnet reformat japin rezultat, dhe nëse drejtësia funksionon, askush nuk është mbi ligjin.
”Mirëpresim vendimin e sotëm të Gjykatës së Posaçme Kundër Korrupsionit dhe Krimit të Organizuar. Tregon se, atje ku ka vullnet, reformat japin rezultat. Kur një sektor i drejtësisë funksionon siç duhet, askush nuk është mbi ligjin.’’, shkruan ambasada në rrjetin social, Facebook.
Ditën e sotme, GJKKO e ka dënuar Llallën edhe me 5 vite përjashtim nga mbajtja e posteve publike. Po ashtu, Llallës i është vendosur sekuestro edhe mbi pasurinë e ish-zyrtarit të lartë të drejtësisë.
Ai akuzohet për disa vepra penale që përfshijnë “Refuzim për deklarim, mos deklarim, fshehje ose deklarim i pasurive, interesave privat të personave të zgjedhur dhe nëpunësve publik ose i çdo personi tjetër që ka detyrim ligjor për deklarim”.
Adriatik Llalla u hetua edhe për pastrimin e parave, por në finale ai u dërgua për gjykim vetëm për fshehje të pasurisë.
