Kreu i KQZ-së, Denar Biba, vazhdon të replikojë në distancë me kreun e partisë LIBRA, Ben Blushi.
Këtë herë, ai e ka cilësuar Blushin si një mashtrues që fyen dhe gënjen ndaj një institucioni.
Statusi i plotë:
Jam i mahnitur nga këmbëngulja e Ben Blushit per të luajtur deri në fund rolin e viktimës së KQZ-së! Nuk e di a është zoti Blushi i vetëdijshëm se nuk po shkruan një libër, ku mund t’i lëshojë frerin fantazisë së tij, por deklarata ku vetëm gënjen dhe fyen një institucion që nuk i ka asnjë borxh.
Sot, i lartpërmenduri ka publikuar një status, ku pretendon se ka fituar gjyqin me KQZ-në, e cila “nuk paska pranuar ta regjistrojë”!!! Ndërkohë, e verteta është se partia e tij “Libra”, është regjistruar e para në KQZ, dhe kjo provohet lehtësisht nga dokumentacioni zyrtar. Zoti Blushi e mbyll statusin e sotëm duke shkruar:
“Nuk e di nëse KQZ do t’i bindet vendimit të Kolegjit… Nuk është më çështje ligjore, as politike, por psiqike”. Në këtë pikë ndaj me zotërinë përfundimin se i gjithë tregimi i tij për raportin e partisë së tij me KQZ, nuk ka as bazë ligjore, as politike, por psiqike. Krijim i mirëfilltë dhe pa konsideratën më të vogël për publikun lexues!
