Rey Manaj pësoi një dëmtim horror në ndeshjen më të rëndësishme të sezonit, ku skuadra e tij Albacete po përballej me atë të vendit të parë që mbahet nga Granada, ish-skuadra e tij. Sulmuesi shqiptar u dëmtua keq në fytyrë pas një dueli me Germán Sánchez në gjysmën e pjesës së parë. Menjëherë pas dëmtimit ai është tra transferuar në spital.
Futbollisti kuqezi ka marrë goditje në kokë dhe nuk e ka vazhduar dot më tej se minuta e 30-të lojën, duke u dërguar me urgjencë në spital, për ekzaminime të hollësishme. “Rey Manaj është transferuar në “Hospital PTS” për të kryer disa teste mjekësore dhe për të diagnostikuar shkallën e dëmtimit të kokës, pas goditjes së marrë gjatë ndeshjes”, – ka shkruajtur klubi “manchego” në llogarinë e vet në Twitter.
Manaj është goditur në fytyrë, në mënyrë të rastësishme, në mes të pjesës së parë të ndeshjes, kështu që mori ndihmën e stafit mjekësor në fushë, para se të zëvendësohej dhe të dërgohej me ambulancë në spital.
Lojtari i Granada, Germán Sánchez, ai që e goditi kaq keq, tha se gjithçka ndodhi pa dashje. Ai, madje, shkoi edhe në spital për ta vizituar personalisht “rivalin” dhe interesuar se si ishte. Natyrisht, ka pasur vend edhe për t’i kërkuar falje shqiptarit, duke këmbëngulur se nuk kishte asgjë të qëllimtë në këtë rast.
