Nga Hillary Clinton, “The Atlantic”/Kanë kaluar gati 2 vjet, që kur Donald Trump fitoi mjaftueshëm vota në Kolegjin Zgjedhor, për t’u bërë president i Shteteve të Bashkuara.
Një ditë më pas, në fjalimin tim të pranimit të humbjes thashë:”Ne i detyrohemi atij të jemi mendje-hapur, dhe shansin për të udhëhequr”. Shpresoja që frika ime mbi të ardhmen tonë, të ishte e ekzagjeruar. Por jo.
Në gati 21 muaj që kur ai mori detyrën e presidentit, Trump ka rënë shumë poshtë nivelit tashmë të ulët standartit, që ai vendosi për vete në fushatën e tij të shëmtuar elektorale.
“Ekspozita A”, është mizoria e papërshkrueshme që administrata e tij ka shkaktuar mbi familjet që hyjnë në SHBA pa dokumente, duke përfshirë edhe ndarjen e fëmijëve, disa ende foshnje 8-muajshe, nga prindërit e tyre.
Trump dhe miqtë e tij, kanë bërë gjëra kaq shumë të neveritshme, që është e vështirë të harrohen. Aktualisht, demokracia jonë është në krizë. Dhe ne duhet të bëjmë gjithçka që mundemi për të dalë prej saj. S’ka asnjë moment për të humbur. Në pikëpamjen time, ekzistojnë 5 fronte kryesore të këtij sulmi mbi demokracinë amerikane.
Së pari, sulmi i Donald Trump mbi sundimin e ligjit. Ish-shefi i FBI, Jim Comey, tha se presidenti i kishte kërkuar besnikërinë e tij jo ndaj Kushtetutës, por vetë Trump. Dhe ai i ka kërkuar Departamentit të Drejtësisë të përndjekë kundërshtarët e tij politikë, duke shkelur një traditë amerikane që në kohën e Thomas Jefferson.
Së dyti, legjitimiteti i zgjedhjeve tona është në dyshim. Ka ndërhyrje të vazhdueshme të Rusisë dhe mungesë vullneti të plotë të Donald Trumpit për t’i ndalur ato, ose për të na mbrojtur. Ndërkohë ka mohim të së drejtës së votes së qytetarëve amerikanë.
Së treti, presidenti i ka hapur luftë së vërtetës dhe arsyes. Më herët gjatë këtij muaji, Trump bëri 125 deklarata të rreme ose mashtruese në vetëm 120 minuta, sipas “The Washington Post”. Ndërsa që nga fillimi i presidencës së tij, sipas shifrave dhe fakteve të gazetës, Trump ka bërë 5.000 deklarata të rreme, ose mesatarisht 32 çdo ditë.
Së katërti, korrupsioni i Trump është galopant. Trump është presidenti i parë në 40 vjet që refuzon të publikojë deklaratat e tij tatimore. Ai ka refuzuar të heqë dorë nga pronat dhe bizneset e tij, siç kanë bërë presidentët e mëparshëm.
Kjo ka krijuar konflikte të pashembullta interesi, pasi lobistët e industrisë, qeveritë e huaja dhe organizatat republikane bëjnë biznes me kompanitë e Trump ose mbajnë aktivitete fitimprurëse në hotelet e tij, në fushat e golfit dhe në pronat e tjera.
Ai po përfiton nga biznesi i presidencës. Trump nuk pretendon t’i japë përparësi të mirës publike, mbi interesat e tij personale apo politike.
Së pesti, Trump minon unitetin kombëtar, që e bën të mundshme demokracinë. Trump as nuk përpiqet të pretendojë, se ai është presidenti i të gjithë amerikanëve. Është e vështirë të injorosh nëntekstin racist, të pothuajse çdo gjëje që thotë presidenti.
Dhe nuk është vetëm ajo që thotë. Që nga dita e parë, administrata e tij ka dëmtuar të drejtat civile, për të cilat gjeneratat e mëparshme luftuan për t’i siguruar dhe mbrojtur. Ka pasur urdhra të profilit të lartë, si ndalimi i udhëtimit të myslimanëve nga disa vende drejt SHBA-së.
Por sulmi mbi demokracinë tonë nuk filloi me zgjedhjen e tij. Gjatë shumë viteve, garancitë e mbrojtjes tonë u “vodhën” nga një grup i vogël miliarderësh të krahut të djathtë – njerëz si familja Mercer dhe Charles dhe David Koch – të cilët shpenzuan shumë kohë dhe para, për të ndërtuar një realitet alternativ ku shkenca mohohet, gënjeshtra maskohet si e vërtetë, dhe ku lulëzon paranoja.
Duke e minuar tryezën e përbashkët, që lejon një popull të lirë të diskutojë dhe marrë së bashku vendime të rëndësishme të vetëqeverisjes, ata i hapën rrugën infektimit nga propaganda ruse dhe gënjeshtrat Trumpiane.
Ata kanë përdorur paratë dhe ndikimin e tyre, për të kapur sistemin tonë politik, për të imponuar një axhendë të krahut të djathtë, dhe për të shfuqizuar miliona amerikanë.
Unë nuk bie dakord me kritikët, që thonë se kapitalizmi është në thelb i papajtueshëm me demokracinë. Por sigurisht që nëse nuk ka rregulla, kapitalizmi grabitqar është i tillë. Pabarazia e madhe ekonomike dhe fuqia korporative e monopoleve, janë antidemokratike dhe shkatërrojnë mënyrën amerikane të jetesës.
Tani duhet të bëjmë gjithçka që mundemi për të shpëtuar demokracinë tonë. Më së pari, duhet të mobilizojmë pjesëmarrjen masive të qytetarëve në zgjedhjet mesit të mandatit në nëntorin e këtij viti.
Ka shumë kandidatë fantastikë që garojnë mbarë vendin, duke pasur si kauza kryesore rritjen e pagave, uljen e kostos së kujdesit shëndetësor, dhe luftën për drejtësi. Nëse fitojnë, ata do të bëjnë gjëra të mëdha për Amerikën. Dhe më në fund, ne mund të shohim një farë mbikëqyrje dhe llogaridhënie në Kongres nga ana e Shtëpisë së Bardhë.
Shënim: Kjo ese, u adaptua si një konspekt i të librit të ardhshëm të zonjës Clinton “Çfarë ndodhi”, që del në librari në SHBA më 18 shtator.
