Ministri i Brendshëm, Dritan Demiraj ka zhvilluar një takim me drejtuesit vendorë të 12 qarqeve dhe drejtuesit kryesorë të Policisë në Drejtorinë e Përgjithshme të Policisë së Shtetit.
Në fokus të këtij takimi ishte marrja e masave konkrete për parandalimin dhe evidentimin e personave dhe grupeve kriminale në drejtim të:
- Shit-blerjes së votës;
- Presionin ndaj zgjedhësve;
- Përdorimin e parave nga burime të paqarta në ndikim të procesit elektorale
- marrjen e bllokimin e kartave përkundrejt shpërblimit monetar me qëllim heqjen e së drejtës për të votuar.
Ministri Demiraj kërkoi nga Policia e Shtetit përmbushjen e të gjitha përgjegjësive ligjore që i jep ligji dhe theksoi se nuk do të tolerohet mbështetja e subjekteve politike nga efektivë me uniformë.
“Çdo tolerim ndaj këtij fenomeni do të penalizohet rreptësisht. I gjithë zinxhiri drejtues i policisë së shtetit do të mbajë përgjegjësi sipas përcaktimeve të ligjit”, u tha ndër të tjera në këtë takim.
Gjithashtu, Drejtori i Policisë së Shtetit z. Haki Çako, 12 drejtorë vendorë të Policisë në qarqe, drejtori i për Hetimin e Krimin Ekonomik e Financiar dhe Drejtori për Sigurinë Publike në Drejtorinë e Policisë së Shtetit raportuan konkretisht evidentimin e të gjithë rasteve konkrete të shit-blerjes së votës, krimeve të tjera elektorale dhe planin e masave për javën e fundit të fushatës zgjedhore ku shtohen aktet e blerjes së votës dhe krimet elektorale.
