Teksa pritet që ministrat teknikë të japin dorëheqjen me humbjen e zgjedhjeve të PD-së, duket se ata nuk kanë ndërmend të tërhiqen deri në shkarkimin e tyre nga kryeministri. Megjithatë, një prej ministrave teknikë që ka pasur një marrëdhënie të mirë me Ramën është ministri i Brendshëm, Dritan Demiraj.
Ky i fundit është 100% dakord me kryeministrin Rama, porositë e të cilit i zbaton një më një. Kështu, një ditë më parë, në mbledhjen e Zyrës Operacionale të Situatës, Rama falendëroi Policinë e Shtetit për operacionet e zhvilluara së fundmi, ku janë kapur tonelata kanabis, si dhe porositi drejtpërdrejt Çakon për angazhimin në kapjen e kokave të narkotrafikut.
Të njëjtën gjë ka bërë edhe ministri Demiraj sot: ai ka zhvilluar një takim në drejtorinë vendore të Policisë në Qarkun Vlorë, ku ka falënderuar drejtuesit dhe efektivët e policisë për dy operacionet e fundit ku u kapen disa tonelata kanabis.
Gjithashtu, në njoftimin e Ministrisë së Brendshme, thuhet se operacionet e policisë Vlorë do të thellohen deri në pastrimin e plotë të sasive të mëdha të kanabisit të grumbulluara në dy vitet e fundit dhe kapjen e kokave të narkotrafikut.
Duket se Rama dhe Demiraj merren vesh mirë me njëri-tjetrin, por të shohim se sa do zgjasë ky bashkëpunim mes tyre./ Tirana Today
NJOFTIMI I PLOTË I MB:
Ministri i Punëve të Brendshme, Dritan Demiraj zhvilloi një takim në drejtorinë vendore të Policisë në Qarkun Vlorë, ku falënderoi drejtuesit dhe efektivët e policisë për dy operacionet e fundit të kapjes së tonelatave kanabis.
Operacionet policisë në qarkun Vlorë do të thellohen deri në pastrimin e plotë të sasive të mëdha të kanabisit të grumbulluara në dy vitet e fundit dhe kapjen e kokave të narkotrafikut.
Ministri Demiraj inspektoi repartin elitë të policisë shqiptare “Delta Forcë”, efektivët e të cilit janë të angazhuar ditë për ditë në goditjen e trafiqeve të paligjshme në vijën bregdetare.
Rritja e kontrollit kufitar dhe bregdetit kundër trafikimit të lëndëve narkotike dhe gjithë trafiqeve të paligjshme është prioritet madhor i qeverisë shqiptare.
Ministri Demiraj ka zbritur në terren prej ditësh për të koordinuar përpjekjet e qeverisë dhe strukturave ligjzbatuese për kontrollin e territorit, hapësirës ajrore dhe vijës bregdetare me qëllim.
