Deklarata e fundit e kryeministrit të Kosovës, Ramush Haradinaj lidhur me demarkacioni, duket se nuk i kanë pëlqyer kryeministrit malazez, Dushko Markoviç.
Ky i fundit ka këshilluar Haradinajn që të tregohet i kujdesshëm dhe i përgjegjshëm për çështjen e demarkacionit, teksa kryeministri i Kosovës deklaroi në sallën e Kuvendit se personalisht nuk e mbështet marrëveshjen e arritur nga qeveria e mëparshme e Kosovës.
Por, Podgorica e konsideron si çështje të mbyllur tashmë demarkacionin dhe kërkon zgjidhjen përfundimtare.
“Dua të porosis qeverinë e Kosovës, kryeministrin e ri që të jenë të përgjegjshëm ndaj kësaj çështje, sidomos të përgjegjshëm ndaj Malit të Zi si shtet mik. Kemi mbështetur Kosovën dhe i mirëkuptojmë rrethanat atje, por që për këtë çështje nuk mund të ketë negociata, pa marrë parasysh vendimet që ata kanë marrë”, tha kryeministri malazez.
Ai shtoi se Mali i Zi e ka kryer punën e vet sa i përket demarkacionit, duke theksuar se nuk do tolerohet lëvizja qoftë aspër një centimetër.
“Çështja e ratifikimit të marrëveshjes është në kompetencë të institucioneve të Kosovës, shpresoj që rreth saj të sillen me përgjegjësi. i kuptoj rrethanat në Kosovë, por Podgorica ka bërë të gjithën që është pjesë e saj dhe se për këtë çështje më nuk do të bisedohet, qoftë edhe për një centimetër”, ka thënë Markoviç në një intervistë për Radiotelevizionin e Malit të Zi.
