Ai ishte më i miri në Kupën e Botës, ishte lojtari kryesor që e dërgoi Kroacinë deri në finale, por duket se ky sukses ka edhe dëmet e tij. Jo vetëm Luka Moderic, por edhe futbollistë të tjerë kroatë që u sforcuan në Botëror kanë shfaqur lodhje në fillimin e kampionatit me ekipet përkatëse.
Modric në sezonin që lamë pas ishte titullar i padiskutueshëm tek Real Madrid dhe mund të themi që ai është “çelësi” i suksesit madrilen, por në javët e para të La Ligas ai është parë më shumë në stol se në fushë. U mendua se situata në merkato ndikoi në klub dhe lidhja që ai krijoi me Interin e dënoi, por e vërteta është ndryshe dhe këtë e sqaron vetë Modric.
“Botërori më ka shkaktuar një lodhje të madhe në nivel fizik dhe psikologjik. Në këto aspekte më shkatërroi. Një ezaurim të mirëfilltë, por tani po ndihem mirë ditë pas dite”, tha fillimisht mesfushori kroat.
Ndërsa në ndeshjen e parë të Champions League, ai ishte zgjedhur titullar nga trajneri Lopetegui, në përballjen e Real Madridit me Romën. “Jam krenar që shokët dhe tifozët mendojnë se unë duhet të fitojë “Topin e Artë”, por nuk është një fiksim për mua. Rëndësi ka vetëm ekipi. Nëse do ta fitojë dakord, do të jem shumë i lumtur, nëse jo nuk ka problem, jeta vazhdon”, përfundoi Luka Modric
