Vijon të jetë “i nxehtë”debati politik lidhur me taksën doganore të mallrave serbe. Së fundmi, kryeministri i Kosovës Ramush Haradinaj i është përgjigjur homologes së tij Ana Bërnabic.
Kjo e fundit tha se dialogu me Kosovën nuk do të vazhdojë pa heqjen e taksës doganore prej 100 për qind për mallrat serbe.
Pas kësaj deklarate, reagoi Haradinaj i cili tha se derisa Serbia vazhdon të veprojë kundër Kosovës, taksa prej 100 për qind ndaj produkteve serbe nuk do të shfuqizohet.
Kreu i ekzekutivit kosovar theksoi se Bërnabic pa fije turpi i kishte bërë thirrje Shqipërisë që të rishqyrtojë njohjen e pavarësisë së Kosovës.
“Sa i përket taksës është e drejtë e jona dhe e mbrojmë sigurinë tonë. Kryeministrja e Serbisë, Bërnabiq vazhdon me letra për qeveri të ndryshme dhe nuk i ka ardhur turp të ia dërgojë një letër edhe kryeministrit të Shqipërisë, Edi Rama, për ta kërkuar tërheqjen e njohjes”, ka thënë Haradinaj.
“Pra përderisa Serbia ka këtë lloj qasje, atëherë kuptohet shumë mirë se për çfarë kemi vepruar ne,” ka thënë Haradinaj.
