Presidenti i Rusisë, Vladimir Putin ka bërë një deklaratë të fortë teksa ka akuzuar Shtetet e Bashkuara të Amerikës se po luajnë një rol destabilizues në Ballkanin Perëndimor.
Këtë deklaratë Putin e bëri gjatë një interviste për gazetën serbe “Novosti”, një ditë para se të mbërrijë për një vizitë në Serbi.
“Përsa i përket situatës në Ballkan, politika e Shteteve të Bashkuara dhe disa vendeve të tjera perëndimore që synojnë të pohojnë rolin e tyre mbizotërues mbetet një faktor serioz destabilizues”, tha presidenti rus Putin.
Po ashtu, Putin kritikoi politikën për zgjerimin e Aleancës së Atlantikut të Veriut, të cilën e konsideroi si një strategji të gabuar dhe destruktive ushtarake e politike.
“Ne gjithashtu kemi thënë në mënyrë të përsëritur se kemi parë politikën e zgjerimit të NATO-s si një mbetje të Luftës së Ftohtë dhe një strategji të gabuar dhe destruktive ushtarake dhe politike”, shtoi ai.
Mbi 70.000 persona pritet t’i urojnë mirëseardhjen Putinit në kryeqytetin e Serbisë, teksa shefi i Kremlinit do të ndalojë edhe në katedralen e Shën Savës.
