Presidenti i Turqisë, Recep Tayyip Erdoğan, ka deklaruar se vrasja e gazetarit saudit Jamal Khashoggi ishte e planifikuar. Ngjarja ka ndodhur në Konsullatën Saudite në Stamboll. Sipas tij krimi ishte i planifikuar. Ai theksoi se kërkesa e tij është që 18 personat e lidhur me vrasjen të gjykohen në Stamboll. Një lajm të tillë e raporton Anadolu Agency (AA).
Presidenti turk, i cili u adresua në Klubin e deputetëve të Partisë së Drejtësisë dhe Zhvillimit në Parlamentin turk, ka folur mbi detajet.
Erdoğan theksoi se tashmë Konventa e Vjenës me gjasë të madhe do të vihet në diskutim. “Konventa e Vjenës nuk do të lejonte të ndodhte një vrasje e tillë ‘brutale’ në një ndërtesë konsullate”, tha ai.
“Qeveria e Arabisë Saudite zyrtarisht pranoi për vrasjen e Jamal Khashoggit, 17 ditë pas ngjarjes”. Presidenti më tej dëshmoi se: “Qeveria e Arabisë Saudite duke e pranuar vrasjen, hodhi një hap të rëndësishëm. Pas kësaj, prej tyre presim që me sinqeritet të nxjerrin në pah të gjithë përgjegjësit dhe t’i dënojnë para ligjit”.
Presidenti turk theksoi se kërkesa e tij është që 18 personat e lidhur me vrasjen Khashoggi të gjykohen në Stamboll. Sipas tij, nëse deklarata se kufoma e Khashoggit i është dhënë bashkëpunëtorit të brendshëm është e saktë, “atëherë kush është ai, duhet të sqaroni”.
“Informacionet dhe faktet e deritanishme tregojnë se Jamal Khashoggi ishte viktimë e një vrasjeje mizore”, theksoi ai.
Presidenti turk po ashtu tha se: “fajësimi i vetëm disa pjesëtarëve të sigurisë dhe inteligjencës për Khashoggin nuk është i kënaqshëm për ne, as për komunitetin ndërkombëtar”.
Khashoggi për herë të fundit u pa më 2 tetor kur hyri në Konsullatën Saudite në Stamboll. Pas më shumë se dy javëve mohime mbi fatin e tij, Arabia Saudite të shtunën pohoi se Khashoggi u vra gjatë një sherri brenda konsullatës.
Në ditën e zhdukjes së Khashoggit, 15 sauditë, përfshirë disa zyrtarë, arritën në Stamboll me dy aeroplanë dhe vizituan konsullatën, në kohën kur gazetari ishte ende brenda, kanë njoftuar burime të policisë turke. Të gjithë individët e identifikuar janë larguar nga Turqia.
Një ekip i përbashkët turko-saudit përfundoi një hetim të enjten, pasi kreu ekzaminime në rezidencën e konsullit dhe Konsullatën Saudite në Stamboll.
