Një nga njerëzit më të kërkuar të drejtësisë, Klement Balili, i është vetëdorëzuar policisë. Balili është pronar bashkë me familjarët e tij i disa bizneseve, ndërsa Ylli Manjani, ish ministri i Drejtësisë i shkarkuar nga Rama, asokohe e lidhi largimin e tij pikërisht me Klement Balilin. Në 30 janar të vitit 2017, Manjani lëshoi “deklaratën bombë” që tronditi politikën e opinionin publik, duke thënë se ministra të PS flinin me dashnoret e tyre te “Santa Quaranta”.
“U shtuan presionet kur bëra deklaratën për kanabisin. E bëra atë deklaratë si qytetar i shqetësuar. Nuk kisha asnjë paragjykim dhe asnjë prapamendim. Kryeministri u nervozua dhe shtyu dy ministra të reagojnë kundër meje.
Të gjithë ata ministra më shkelin syrin, por kanë frikë të flasin. Që pas asaj situate, është shtuar presioni jo ndaj meje, por ndaj kryetarit të Kuvendit për largimin tim. Unë e di pse.
Nuk është rastësi që bashkohet me emrin tim me dosjen e Klement Balilit. Ndërkohë që në Tiranë lidhej emri im me Klement Balilin, ministrat flinin me dashnoret te Santa Quaranta”, ka deklaruar Manjani në janar të vitit 2017.
