Është një pyetje shumë e vjetër:të gjithë i duam paratë, por a na bëjnë ato të lumtur? Në mënyrë të pandryshueshme, përgjigjja është e nuancuar. Por tanimë janë shfaqur disa përgjigje më të qëndrueshme.
Studiuesit kanë grumbulluar të dhëna mbi marrëdhëniet midis parave dhe emocioneve nga më shumë se 1.6 milion njerëz në 162 vende të botës. Ata zbuluan se njerëzit më të pasur, kanë më shumë “emocione të respektit ndaj vetes”, siç janë besimi, krenaria dhe vendosmëria.
Nga ana tjetër, njerëzit me të ardhura më të ulëta, kishin më shumë emocione negative ndaj vetes si ankthi, trishtimi dhe turpi, raporton një studim në fjalë i botuar në revistën “Emotion”. Dhe nuk është për t’u habitur, që pasja e një ndjenje më të madhe të kontrollit, ndërhynte në këto ndjenja.
Pra me fjalë të tjera, njerëzit që kanë më shumë pasuri dhe vetëbesim më të madh, ndiheshin gjithashtu se kishin më shumë nën kontroll drejtimin e jetës së tyre, dhe ishin më të aftë për të kapërcyer pengesat. Këto rezultate ishin të vërteta në të gjitha vendet me të ardhura të larta, por edhe ato në zhvillim.
Por prisni, ka edhe më shumë sesa kaq. Kur është fjala për ndjenjat që njerëzit kanë ndaj të tjerëve, si dashuria, zemërimi, mirënjohja dhe dhembshuria, gjetjet e studimit nuk janë dhe aq të qarta. Në të nuk kishte një lidhje të qëndrueshme midis këtyre emocioneve dhe të ardhurave.
“Pasja e më shumë parave, nuk e bën domosdoshmërisht një person më të dhembshur dhe më mirënjohës ndaj të tjerëve, dhe një pasuri më e madhe mund të mos kontribuojë në ndërtimin e një shoqërie më solidare dhe tolerante”- thotë autori kryesor Edi Tong, nga Universiteti Kombëtar i Singaporit.
Edhe lumturia dhe emocionet e tjera globale, nuk kishin një raport të qëndrueshëm me të ardhurat në të gjithë vendet, ndaj ekspertët debatojnë ende mbi faktorët e tjerë që ndikojnë.
Është e rëndësishme të theksohet se studimi, i bazuar në 5 grupime të mëdha të dhënash, është korrelativ.
Sidomos të dhënat e marra në SHBA, treguan se të ardhurat parashikuan shtimin e emocioneve të respektit për veten me kalimin e kohës. Lidhjet mes parave dhe ndjenjave ishin relativisht të vogla, prandaj fotografia e vërtetë e situatës është më komplekse.
Por autorët vërejnë se “disa efekte të vogla mund të grumbullohen me kalimin e kohës, për t’u bërë efekte praktikisht të rëndësishme në jetën reale”. Gjetjet e këtij studimi, mund të kenë një rëndësi thelbësore në botën reale, si në nivelin individual, ashtu edhe në atë shoqëror.
Burimi i lajmit: https://cosmosmagazine.com/people/behaviour/rich-feelings-better-or-worse
Përshtatur nga TIRANA TODAY
