De Rossi u kërkon ndjesë suedezëve pas ndeshjes

Daniel De Rossi ka bërë një gjest të madh pas ndeshjes që zhvilloi Italia në “San Siro”, përballë Suedisë  ku vulosi eliminimin nga Kupa e Botës për axurrët. De Rossi ka gjetur kohë për tu futur në autobusin e suedezëve të drejtuar nga Andersson dhe u ka kërkuar falje për vërshëllimat që kishte gjatë këndimit të himnit të tyre. Këtë fakt e bën të ditur tabloidi “Exspressen”, ku për të cilin është prononcuar mbrojtësi i djathtë i suedezëve, Mikael Lustig. Më pas, mesfushori i uroi suksese për pjesëmarrjen në Kupën e Botës. Një gjest i madh, që mbylli disa polemika.

Vetëm një futbollist i madh, por mbi të gjitha një njeri i madh, mund të mendonte të korrigjonte vërshëllimat që pushtuan himnin e Suedisë në “San Siro”, duke kërkuar falje në emër të kombit të tij. Kjo ishte historia. De Rossi mori përsipër të ndreqte gabimin e bërë nga bashkatdhetarët e tij kur në fund të ndeshjes shkoi të takonte personalisht suedezët për t’i kërkuar ndjesë dhe për t’i përgëzuar për fitoren. Një gjest i rëndësishëm, si kampion i vërtetë.