Mërgim Mavraj do të jetë kapiteni për sfidën miqësore të së hënës përballë Norvegjisë. Në konferencën për shtyp të ditës së sotme qendërmbrojtësi ka folur për atmosferën e skuadrës dhe ndryshimin mes De Biasit dhe Panuccit. Lojtari i Hamburgut që mbanë prej disa vitesh vendin e titullarit në skuadër beson se nuk ka ndonjë ndryshim nëse ke shiritin e kapitenit në krah apo jo, ajo që do të sjellë sukses është se duhet të jenë të 11 lojtarët që do të zbresin në fushë liderë, vetëm kështu mund të arrihen gjëra të mëdha.
“ Mbrojtja ka qenë një nga pikat e më të forta të Shqipërisë, besoj se në këtë repart kemi lojtarë shumë të mirë, tani kanë ardhur në skuadër edhe disa elemente të rinj që do të na ndihmojnë”.
Cili është ndryshimi midis Panuccit dhe De Biasit?
“ Mosha bën të vetën, Panucci është disi më energjik se De Biasi dhe ndryshon nga ai. Mbrojtja me asnjë nga trajnerët nuk ka qenë problem kështu që besoj se do të vazhdojmë të bëjmë paraqitje të mira në këtë repart”.
Sa ndikon kapiteni në skuadrën kombëtare?
“Në fushë duhen 11 liderë, nuk ka shumë rëndësi nëse është larguar Lorik Cana apo dikush tjetër, që një përfaqësuese të ketë sukses duhet të ketë në fushë 11 luftëtarë që japin më të mirën për skuadrën. Nuk ka shumë rëndësi se kush është kapiteni, rëndësi ka që të gjithë futbollistët të japin maksimumin e tyre në fushë”.
Ndryshimi i modulit të lojës?
“ Në futboll rëndësi kanë vetëm rezultatet dhe jo mënyra sesi luan skuadra. Është e vërtetë që tashmë jemi më të prirur drejt sulmit, por edhe De Biasi ka meritat që kombëtarja është në këtë nivel që ndodhet sot”.
Mendimi juaj për prurjet e reja në kombëtare?
“ Të rinjtë kanë sjell entuziasëm po bëjnë maksimumin për t’u përshtatur sa më shpejtë dhe të futen në mekanizmat e skuadrës. Sigurisht që Shqipëria e ka grupin për të luajtur me skemën 4-3-3”.
A do të kualifikohet Shqipëria në Euro 2020?
“Është shpejt për të folur për Europianin e ardhshëm por ne do të bëjmë gjithçka për të qenë pjesë sërish në kampionatin europian atë të vitit 2020”
