Data 10 Dhjetor shënon Ditën Ndërkombëtare të të Drejtave të Njeriut në të gjithë botën.
Data e sotme shënon një nga ngjarjet më të rëndësishme sa i përket të drejtave të njerëzve dhe përpjekjeve të pafundme për të fituar të drejtat e barabarta. Deklarata Universale për të Drejtat e Njeriut është miratuar me 10 dhjetor të vitit 1948 nga Asambleja e Përgjithshme e Kombeve të Bashkuara.
Pas nënshkrimit të këtij akti historik, Asambleja ka ftuar të gjithë shtetet anëtare të shpallin tekstin e Deklaratës dhe të vendosin përpjekjet e para për ta përhapur dhe të lexohet, por më e rëndësishmja ishte të mësohet në shkolla dhe institucione të tjera edukuese pa marrë parasysh statusin politik të vendeve të tjera.
Asambleja shpalli këtë deklaratë si ideal të përgjithshëm, që duhet të merret dhe të përthithet nga të gjithë kombet, në një formë të cilën çdo njeri dhe çdo organizëm shoqëror të marrë parasysh këtë vlerë madhore të themeluar për një të nesërme më të mirë dhe me prespektivë të madhe.
Pjesë e kësaj ishte të sigurohej njohja dhe zbatimi i tyre i përgjithshëm dhe i vërtetë, si midis popujve të vetë shteteve anëtare, ashtu edhe midis popujve të atyre territoreve që janë nën administrimin e tyre.
Në këtë deklaratë spikat universaliteti, karakteri i pandashëm dhe i patjetërsueshëm i të drejtave dhe lirive, i standardeve ndërkombëtare të drejtave të njeriut ; legjislacioni ndërkombëtar i të drejtave të njeriut ; të drejtat e trashëguara; institucionet dhe procedurat për zhvillimin dhe mbrojtjen e të drejtave të njeriut.
