Drejtoresha e Departamentit të Administratës Publike (DAP), Albana Koçiu, në vijimësi të deklaratave të kryeministrit Rama, tha sot se administratës nuk do t’i mohohet e drejta për t’u angazhuar me çdo forcë politike jashtë orarit të punës.
Gjatë një daljeje publike nga Kryeministria, Koçiu njoftoi se, “Sot finalizohet vendimi që parashikon ngritjen e një strukture monitorimi për administratën në këtë periudhë, në respekt të detyrimeve që nëpunësit duhet të kenë në konsideratë”.
Por ajo shtoi se, të drejtat e nëpunësve fillojnë pas orarit të punës dhe ka nënvizuar se, “secili ka të drejtë të angazhohet në cilëndo forcë politike që simpatizon”.
Deklarata e Koçiut vjen pas asaj të kryeministrit Rama, i cila dje u shpreh qartazi se administrate duhet monitoruar vetëm gjatë orarit të punës, ndërsa jashtë tij, është e lirë t’i bashkohet cilit do aktivitet.
