Danimarka ka dëbuar 15 oficerë të dyshuar të inteligjencës ruse, për të cilët pretendon se punonin të fshehtë si diplomatë, tha të martën Ministria daneze e Punëve të Jashtme.
Ambasadori i Rusisë në Danimarkë u thirr në Ministrinë e Jashtme në Kopenhagë, ku qeveria përcolli “dënimin e fortë të brutalitetit të Rusisë kundër civilëve ukrainas në Bucha” dhe “theksoi se sulmet e qëllimshme kundër civilëve janë një krim lufte”, thuhet në deklaratë. Atyre u është dhënë 14 ditë afat për t’u larguar nga vendi.
Ambasada ruse në Danimarkë u përgjigj duke thënë se “asnjë provë” nuk iu ofrua ambasadorit, për të provuar se diplomatët ishin spiunë.
“Të gjithë punonjësit e institucioneve të huaja ruse në Danimarkë ndjekin me përpikëri dispozitat e Konventës së Vjenës për Marrëdhëniet Diplomatike në aktivitetet e tyre”, thuhet në një deklaratë të Ambasadës Ruse.
“Ky hap i palës daneze nuk ka asnjë bazë, dhe synon shkatërrimin e mëtejshëm të marrëdhënieve mes vendeve tona. Nuk do të mbetet pa përgjigje”.
Lëvizja e Danimarkës pason dëbimin e oficerëve të inteligjencës ruse nga disa vende të tjera evropiane, duke përfshirë Francën, Gjermaninë dhe Holandën, në përgjigje të luftës në Ukrainë.
Megjithatë, ministri i Jashtëm danez Jeppe Kofod, tha në Parlament se Danimarka nuk dëshiron të prishë marrëdhëniet diplomatike me Moskën, dhe sqaroi se dëbimi nuk përfshin ambasadorin rus apo pjesën tjetër të stafit të ambasadës në Kopenhagë.
“Është vetëm një çështje e dëbimit të oficerëve të inteligjencës”, tha ai në përgjigje të ndryshimeve dramatike në tablonë e sigurisë evropiane në javët e fundit.
“Me këtë vendim, ne po i dërgojmë një sinjal të qartë Moskës se nuk do të pranojmë oficerët e inteligjencës ruse të spiunojnë në tokën daneze. Ato paraqesin një rrezik për sigurinë tonë kombëtare, që ne nuk mund ta injorojmë”.
Burimi i lajmit: CNN. Përshtatur nga Tirana Today
