Jepet masa e sigurisë për tre grabitësit e pikës së exchange në Fier. Lulëzim Demiraj, 43 vjeç nga Vlora, Zini Fyraj, 37 vjeç nga Sevasteri i Vlorës dhe Dashamir Gergali, 41 vjeç nga Zhupani i Fierit kanë mbërritur paraditen e sotme në Gjykatën e Fierit.
Kjo e fundit ka lënë në burg 43-vjeçarin Lulëzim Demiraj nga Vlora, i cili zbulohet se ka qëlluar me automatik, duke plagosur Gëzim Hoxhën dhe vrarë Agur Vrenozin. Ai ka shprehur pendesë dhe ka kërkuar falje. “Jam penduar. I kërkoj falje popullit dhe drejtësisë”, tha Demiraj.
Demiraj akuzohet për “vjedhje me pasojë vdekjen” dhe “Armëmbajtje pa leje”. Edhe dy autorët e tjerë të grabitjes do të njihen sot me masën e sigurisë.
Grabitja ndodhi ditën e premte, ku tre persona grabitën nën kërcënimin e armëve pikën e exchange, në pronësi të Hoxhës, i cili mbeti i plagosur, ndërsa Vrenozi ndërhyu për të ndaluar grabitësit, por u plagos në kokë e më pas ndërroi jetë.
Tre autorët morën 6 360 euro dhe 954 900 lekë, por u kapën pas një operacioni të policisë.
