Gjatë një qëndrimi në Bruksel, ministrat e jashtëm të Maqedonisë dhe Greqisë, Nikolla Dimitrov dhe Nikos Kotzias kanë arritur marrëveshje kornizë për zgjidhjen e çështjes së emrit. Këtë e ka bërë të ditur vet ministri maqedonas gjatë një deklarate për mediume.
“Kemi pasur takim produktiv, kemi kornizë që duhet të përpunohet dhe në të për momentin po punojnë ekipe të juristëve nga të dy ministritë. Planifikohet bisedë e rëndësishme në nivel kryeministrash, Zaev me Ciprasin kah mesi i javës, ku shpresojmë se do të vendosin për disa gjëra të rëndësishme nga opsionet që janë në lojë”, ka deklaruar Dimitrov.
Shefi i diplomacisë së Maqedonisë dje në Bruksel ka pasur takim edhe me përfaqësuesen e lartë të BE-së, Federika Mogerini, ndërkaq në mëngjes ka pasur takim me ministrat e Punëve të Jashtme të vendeve anëtare të BE-së.
Gazeta greke “Katimerini” dje publikoi se Athina dhe Shkupi përsëri kërkojnë emër për përdorim të përgjithshëm pas mossuksesit nga të dyja palët që të pajtohen me emrin “Republika Ilinditase e Maqedonisë”, dhe sipas burimeve të informuara mirë nga tavolina e bisedimeve, emri i ri është i lidhur me Krushevën, i cili ende nuk është zbuluar në opinion.
Mos është vetë Krusheva?
Ilindeni lidhet pikërisht me këtë qytet maqedonas, pasi aty u gatua kryengritja anti-osmane. Madje në Krushevo këto ditë është kërkuar që, nëse Maqedonia do quhet Republika e Maqedonisë Ilindenase, kryeqyteti duhej zhvendosur nga Shkupi me Krushevo.
