Në media është deklaruar shumë herë se në dialogun që do të zhvillohet mes Kosovës dhe Serbisë do të jenë të pranishëm përfaqësues të SHBA-ve dhe Be-së. Me sa duket serbët kanë filluar të interesohen më parë së të fillojnë bisedimet. Zëvendëskryeministri dhe ministri i Jashtëm i Serbisë, Ivica Daçiç u takuan në Uashington me ndihmësin e ri të Sekretarit të Shtetit të SHBA-ve për Çështjet Evropiane dhe Euroaziatike, Wess Mitchell. Daçiç është zyrtari i parë serb që foli me këtë zyrtar të lartë të administratës amerikane, shkruan b92.
Pas takimit, Daçiç tha se bisedimet ishin shumë komplekse dhe se fokusi i tyre ishte në gjetjen e një interesi të përbashkët midis Shteteve të Bashkuara dhe Serbisë.
“Duke pasur parasysh miqësinë që ka zgjatur me shekuj dhe traditën e gjatë të marrëdhënieve diplomatike, kam këmbëngulur se si të gjejmë minimumin e interesave të përbashkëta, nëse nuk mund të gjejmë maksimumin, për të kontribuar bashkërisht në stabilitetin e rajonit tonë,”deklaroi Daçiç.
Në këtë kuptim, takimi me Mitchell ishte i një rëndësie të madhe, vuri në dukje ministri dhe shprehu shpresë se do të vizitojë Serbinë vitin e ardhshëm.
“Serbia ka një qasje konstruktive, dëshiron të kontribuojë në stabilitetin e rajonit, por dëshiron që interesat e saj të respektohen dhe të arrijë një zgjidhje të drejtë dhe të qëndrueshme për të gjitha problemet në rajon, veçanërisht për çështjen e Kosovës dhe Metohisë” përfundoi Daçiç. TIRANA TODAY
