Merkato e transferimeve është në orët e fundit dhe skema e bashkëpunimit mes dy klubeve angleze dhe klubit gjerman ka funksionuar më së miri. Tre lëvizje të shumëpërfolura janë finalizuar me sukses. Ka qenë një shkëmbim lojtarësh mes Arsenal-Chelsea dhe Dortmund.
Perre-Emerick Aubameyang ka mbyllur me sukses kalimin tek Arsenal dhe kjo ka bërë që edhe dy sulmues të tjerë të lëvizin pas tij. Bëhet fjalë për sulmuesin francez të Arsenal, Olivier Giroud, që ka mbyllur kalimin e tij tek Chelsea i Antonio Contes, për shumën e 20 milionë euro. Kjo lëvizje ishte e detyruar për francezin i cili ka pasur shumë pak hapësira tek “topçinjtë” deri në këtë fazë të sezonit dhe me ardhjen e sulmuesit nga Gaboni do të bëhej më e vështirë.
Nga ana tjetër, Chelsea pas nënshkrimit me Giroud do të kishte një mbipopullim në vijën e sulmit dhe sulmuesi belg, Michy Batshuayi, do ta kishte të vështirë të qëndronte edhe si rezervist i parë. Për këtë arsye Chelsea ka mbyllur me sukses kalimin e tij tek Dortmund, i cili kishte për të mbushur një boshllëk të madh në sulm pas largimit të Aubameyang.
