Sekretari amerikan i Shtetit, Rex Tillerson është kundërshtuar nga Shtëpia e Bardhë dhe departamenti i saj, pasi deklaroi se SHBA-të kishin zbutur qëndrimin e saj mbi bisedimet me Korenë e Veriut.
Tillerson tha të martën se ishte i gatshëm që të hapte dialogun me Penianin, pa parakushte.
Por brenda një dite, Shtëpia e Bardhë dhe Departamenti i Shtetit kishin përsëritur vijën e ashpër të administratës, duke theksuar se Koreja e Veriut duhet së pari të angazhohet për braktisjen e armëve bërthamore.
Mesazhet “e përziera” shënojnë herën e tretë në muajt e fundit, ku dëshmojnë se Tillerson ka qenë publikisht në kundërshtim me Shtëpinë e Bardhë.
Duke folur në një forum të politikës në Uashington të martën, sekretari i shtetit tha: “Ne kemi thënë nga ana diplomatike që jemi gati të flasim çdo kohë me Korenë e Veriut, do të dëshironim të flisnim dhe jemi gati të kemi takimin e parë pa parakushte”.
Një zyrtar i Shtëpisë së Bardhë i tha agjencisë së lajmeve Reuters të mërkurën: “Administrata është e bashkuar duke insistuar që çdo negociatë me Korenë e Veriut duhet të presë derisa regjimi të përmirësojë thellësisht sjelljen e tij.”
Heather Nauert, një zëdhënëse e Departamentit të Shtetit, përsëriti qëndrimin e administratës lidhur me parakushtin për programin bërthamor të Koresë së Veriut.
Ajo tha: “Politika jonë nuk ka ndryshuar. Diplomacia është prioriteti ynë kryesor përmes fushatës sonë të presionit maksimal. Ne mbetemi të hapur për dialog kur Koreja e Veriut të jetë e gatshme të kryejë një dialog serioz dhe të besueshëm për denuklarizimin paqësor, por kjo kohë nuk është tani”. TIRANA TODAY
