Sokol Cikalleshi ka shënuar golin e parë në kampionatin turk, për ekipin që iu bashkua këtij sezoni Osmanlispor. Sulmuesi kavajas ka shënuar golin e dytë dhe ekipi i tij fitoi me rezultatin 3-0 dike marrë pikët e para pas 7 javësh. Një rikthim mjaft i mirë në kombëtare për bomberin, i cili vjen pas shënimit të një goli mjaft të rëndësioshëm. Cikalleshi flet edhe për festën e veçantë që bëri mbas shënimit të golit.
BOMBERI – Në një prononcim për “Panorama Sport”, sulmuesi kuqezi ka folur rreth golit, dedikimit, formës së skuadrës dhe pritshmërive që ka për Kombëtaren. “Jam shumë i lumtur për fitoren e ekipit, sepse nuk kemi pasur një pozitë aspak të mirë. Me trajnerin e ri situata duket se po rikthehet në normalitet dhe diçka e tillë u pa dje, ku fituam, por edhe bëmë lojë të mirë dhe gjërat funksionuan shumë mirë.
Goli? Nuk u shënua vetëm një, por tre. Pra nuk ishte vetëm Sokoli në formë, por i gjithë ekipi. Jemi keq në renditje, por duam që të luftojmë për Kupat e Europës dhe duam që të arrijmë edhe fitore të rëndësishme dhe të vështira. Dedikimi? Besoj çdo njeri e kupton. Unë dhe bashkëshortja ime, Kornelia, jemi në pritje të një fëmije dhe tetori është muaji i pritjes sonë. Është bekimi më i mrekullueshëm i çdo çifti”, tregon Cikalleshi, i cili i është përgjigjur me formën më të mirë rikthimit në Kombëtare.
Ndeshjet? “Janë dy përballje shumë të vështira në letër, megjithatë ne do të tentojmë diçka madhështore. Do të mundohemi të japim më të mirën tonë për të arritur diçka në këto dy sfida. Unë jam gati, por trajneri është trajneri që vendos”, ka deklaruar Sokol Cikalleshi.
ITALI – Në Serinë B ka festuar vetëm Emanuele Ndoj, një prej lojtarëve që kanë kaluar nga Shpresat te skuadra Kombëtare A. Breshia e tij fitoi 2- 1 përballë Peruxhas, por shqiptari është zëvendësuar në minutën e 54-t dhe vlerësohet me notën 6. Veseli është vlerë- suar me notën 5.5 nga “tuttomercatoweb” në humbjen 3- 2 të Empolit në fushën e Avelinos.
Bari i Migjen Bashës është mundur 1-0 nga Spezia që i ka shënuar edhe pse me dhjetë veta në fushë. Shqiptari është ndëshkuar me karton të verdhë në të 90+2-ën dhe është vlerësuar me notën 5.5. në Rusi, Akhmat Grozni i shqiptarëve është mundur 1-0 nga Tosno, me Balajn që e ka ndjekur ndeshjen nga stoli dhe Roshi, i cili është aktivizuar në minutën e 53-të.
Greqi – Ergys Kaçe nuk është përfshirë as në ndeshjen e djeshme të PAOK-ut kundër AEL Larisas, ndërkohë që Andi Lila ka ndjekur nga stoli sfidën ku PAS Janina është mundur 2- 0 ndaj Panathinaikosit. Barazime për Xhakën dhe Mavrajn, me mesfushorin që ka qenë në fushë për 90 minuta dhe është ndëshkuar me të verdhë, ndërsa Mavraj e ka ndjekur derbin në Gjermani nga stoli./p.sport
