Mbrëmja e së martës na rikthen emocionet e kompeticionit magjik të futbollit, Champions League. Në ndeshjen e vlefshme për 1/8-at, ekipi zviceran Basel do të presë të “frikshmit” e drejtuar nga Pep Guardiola.
City vjen si kryesues i Grupit F, ndërsa Basel ka zhvilluar ndeshje fantastike dhe e mbylli fazën e grupeve mbas Manchester United, në Grupin A. Që nga dhjetori i 2017-ës, kur futbolli zviceran është ndërprerë për shkak të pushimeve të dimrit, Basel ka luajtur vetëm dy ndeshje zyrtare, ndërsa City ka luajtur 14.
Një përballje mjaft interesante kjo pasi dy ekipet nuk janë përballur asnjëherë në histori mes tyre. Por Guardiola e ka vizituar më parë Basel-in dhe ka marrë një fitore 5-0 në 2008-ën me Barcelona-n. Ajo ka qenë edhe humbja më e thellë e pësuar nga zviceranët në Champions League. Diferencat mes tyre janë me të vërtetë të mëdha, pasi Basel si klub arrin vlerën e 57 milionë euro, ndërsa “qytetarët” shpenzuan 65 milionë euro në merkaton e janarit vetëm për të siguruar shërbimet e Aymeric Laporte. Por duhet theksuar se City ka lënë pikë në fazën e grupeve vetëm në ndeshjen e fundit, kur gjithçka ishte vendosur. Ndërsa tani pritet që përkushtimi i tyre do të jetë suksesi në Europë duke ditur që kampionati është pothuajse i siguruar.
Një nga lojtarët më në formë të Pep Guardiola-s është Sergio Aguero, i cili ka shënuar 13 gola në dhjetë ndeshjet e fundit dhe katër në ndeshjen e kampionatit të luajtur në fundjavë. Ai pritet të jetë kërcënimi numër një për mbrojtjen vendase. Lojtari më i rrezikshëm i zviceranëve do të jetë Dimitri Oberlin, i cili ka shënuar katër gola në këtë edicion të Champions League, dhe ka realizuar në ndeshjen e fundit të kampionatit. Për sa i takon statistikave, City ka shënuar nëntë gola në tri transfertat e luajtura deri tani në Champions League. Ata kanë shënuar 2 ose më shumë gola në 14 ndeshje të luajtura në transfertë në këtë sezon. City ka arritur deri në gjysmëfinale sezonin e kaluar, ndërsa Basel nuk e ka kaluar asnjëherë këtë raund.
