Kreu i Komisionit Qendror të Zgjedhjeve, Denar Biba, paraditen e sotme ka shkuar në selinë e Kryeministrisë.
Nga burimet mësohet se ai ka zhvilluar një takim kokë më kokë me kreun e qeverisë, Edi Rama.
Nuk dihet tema e diskutimit mes tyre, por ajo që mund të thuhet me siguri është se Denar Biba ka ngjitur shkallët e kryeministrisë vetëm pak minuta pasi Rama hyri në zyrë, pas takimit që zhvilloi në selinë e Kuvendit, me aleatin e tij, Ilir Meta, shkruan Balkanweb.
Nga “Çadra e lirisë”, lideri i opozitës, Lulzim Basha sqaroi sot se “koka” e Denar Bibës bashkë me katër poste ministrore i ishin ofruar një natë më parë nga kryeministri Rama, si pjesë e një marrëveshjeje politike. Por këtë ofertë Basha e refuzoi, duke mos hequr dorë nga kërkesa e tij për krijimin e një qeverie teknike, pa Ramën në krye të saj.
