8 Tetor 1992- Vdes ish-kancelari gjerman Willy Brandt
Willy Brandt, ishte një burrë shteti dhe politikan gjerman, udhëheqës i Partisë Socialdemokrate të Gjermanisë (SPD) në vitet 1964-1987, dhe kancelar i Republikës Federale të Gjermanisë (Gjermania Perëndimore) në vitet 1969-1974. Brandt fitoi Çmimin Nobel për Paqe në vitin 1971, në shenjë mirënjohje për përpjekjet e tij për të forcuar bashkëpunimin në Evropën Perëndimore, si dhe për të arritur pajtimin mes Gjermanisë Perëndimore dhe Gjermanisë Lindore dhe vendeve të tjera të Evropës Lindore, e quajtur ndryshe si Ostpolitika. Por Brandt ishte kontradiktor si me krahun e djathtë, me Ostpolitikën e tij ashtu edhe me krahun e majtë, për shkak të mbështetjen e tij ndaj politikave amerikane, përfshirë Luftën e Vietnamit dhe regjimeve autoritare të krahut të djathtë.
Willy Brandt ishte gjithashtu i njohur për politikat e tij të ashpra antikomuniste në nivel vendor, duke arritur kulmin me Radikalenerlass (Dekreti Anti-Radikal) në vitin 1972. Ai dha dorëheqjen si kancelar në vitin 1974, pasi Günter Guillaume, një prej ndihmësve të tij më të afërt u zbulua se ishte një agjenti i STASI-t, shërbimi sekret i Gjermanisë Lindore.
8 Tetor 1970 – Shkrimtari rus, Aleksandr Solzhenitsyn, fiton çmimin Nobel në letërsi
I lindur në vitin 1918 në Bashkimin Sovjetik, Solzhenitsyn ishte një shkrimtar i shquar dhe kritiku kryesor i represionit të brendshëm sovjetik. I arrestuar në vitin 1945 për kritikat ndaj regjimit të Stalinit, ai qëndroi 8 vjet në burgjet dhe kampet ruse të punës. Pas lirimit në vitin 1953, u dërgua në “mërgim të brendshëm” në Rusinë aziatike.
Pas vdekjes së Stalinit, Solzhenitsyn lirohet nga mërgimi i tij dhe filloi të shkruante me zell. Botimi i tij i parë, “Një ditë nga jeta e Ivan Denisoviç” (1963), u shfaq në atmosferën disi më pak represive të regjimit të Nikita Hrushovit (1955-1964). Libri u lexua gjerësisht si në Rusi ashtu edhe në Perëndim, dhe kritikat e tij të ashpra kundër shtypjes staliniste, ofronin një pasqyrë dramatike të sistemit sovjetik.
Megjithatë, zyrtarët sovjetikë i mbyllën shpejt gojën Solzhenitsyn dhe artistëve të tjerë rusë, dhe tani e tutje veprat e tyre duhej të dilnin në mënyrë sekrete jashtë Rusisë, në mënyrë që të publikoheshin. Këto vepra përfshinin romanin “Pavioni i kancerozëve” (1968) dhe kryeveprën me 3 vëllime “Arqipelagu Gulag” (1973-1978). Qeveria sovjetike shfaqi pakënaqësinë e saj ndaj shkrimeve të Solzhenitsinit, duke e penguar atë që të merrte personalisht në dorëzim çmimin Nobel në vitin 1970.
Në vitin 1974, ai u dëbua nga Bashkimi Sovjetik për tradhëti, dhe u transferua në Shtetet e Bashkuara. Edhe pse cilësohet si një simbol i rezistencës antikomuniste, Solzhenitsyn qe gjithashtu tepër kritik ndaj shumë aspekteve të shoqërisë amerikane; veçanërisht ndaj asaj që ai e quajti materializëm të tepruar. Ai u rrikthye në Rusi në vitin 1994, dhe vdiq nga pushimi i zemrës në Moskë më 3 gusht 2008, në moshën 89-vjeçare.
8 Tetor 2005 – Një tërmet katastrofik godet rajonin e Kashmirit në Pakistan
Një tërmet i fortë i shkallës 7.6 Rihter, goditi Kashmirin në rajonin kufitar midis Indisë dhe Pakistanit mëngjesin e 8 tetorit 2005. Numri zyrtar i viktimave të konfirmuara nga autoritetet pakistaneze ishte 74.698, ndërsa organizatat ndërkombëtare folën për rreth 86.000 viktima.
Duke qenë se e shtuna është një ditë normale e shkollës në rajon, shumica e nxënësve ishin në mësim kur ra tërmeti, dhe për pasojë shumë prej tyre u varrosën nën rrënojat e ndërtesave të rrënuara. Shumë njerëz u bllokuan edhe në shtëpitë e tyre, dhe për shkak se ishte muaji i Ramazanit, dhe shumica e njerëzve po merrnin një sy gjumë pas vaktit të konsumuar në orët të para të mëngjesit, dhe nuk patën kohë t’i shpëtonin tërmetit.
8 Tetor 1998 – Dhoma e Përfaqësuesve në SHBA, voton për të nisur procedurat e shkarkimit të presidentit Bill Clinton, duke e akuzuar për dëshmi të rreme dhe pengim të drejtësisë, në rastet që kishin të bënin me marrëveshjet e pasurive të tij të patundshme në Arkansas.
8 Tetor 1990 – Shtatëmbëdhjetë palestinezë qëllohen për vdekje, dhe mbi 100 të tjerë plagosen nga policia izraelite në xhaminë Al Aksa në malin e Tempullit të Jerusalemit, një vend i shenjtë si për hebrenjtë asht edhe myslimanët.
8 Tetor 2001 – Dy avionë rrëzohen gjatë ngritjes nga aeroporti i Linates në Milano të Italisë. Nga kjo ngjarje tragjike, mbetën të vdekur 118 persona. Shkak për aksidentin mendohet se ishte mungesa e një radari në terren, i cili kishte dalë jashtë funksionit prej dy vitesh.
8 Tetor 1871 – Një zjarri i madh përfshin qytetin e Çikagos në SHBA. I favorizuar nga erërat e forta dhe ndërtimet kryesisht me dru, në më pak se 24 orë ai do të zhdukte një të tretën e qytetit. Mbi 250 persona humbën jetën, 98.500 njerëz mbetën të pastrehë, dhe 17.450 ndërtesa u bënë shkrumb e hi.
8 Tetor 1690 – Beogradi bie sërish nën kontrollin e Perandorisë Osmane.
8 Tetor 1855 – Arroë, një anije që lundronte me flamurin britanik, kapet nga kinezët që arrestojnë gjithë ekuipazhin, duke filluar kështu Luftën e Dytë Kineze.
8 Tetor 1912 – Mali i Zi i shpall luftë Perandorisë Osmane, duke filluar kësisoj Luftën e Parë Ballkanike.
8 Tetor 1922 – Lillian Gatlin bëhet pilotja e parë femër, që fluturoi përgjatë gjithë Shteteve të Bashkuara.
8 Tetor 1967 – Kapet në Bolivi, pas një përleshje me armë me forcat qeveritare dhe marinsat amerikanë, guerrilasi i njohur komunist Ernesto Che Guevara.
8 Tetor 1991 – Kroacia voton në shumicë në një referendum pro shkëputjes nga Jugosllava.
