15 Shtator 1997- Nis funksionimin motori i kërkimit “Google”
Google filloi në janar 1996 si një projekt kërkimi nga Larry Page dhe Sergey Brin. Page, një student diplomant në Universietin e Stanford-it, ishte duke punuar për Stanford Digital Library Project (SDLP). Qëllimi i SDLP-së, ishte “të zhvillonte teknologjitë e mundshme për një bibliotekë dixhitale unike, të integruar dhe universale”, në një kohë që financohej nga Fondacioni Kombëtar i Shkencës, në mesin e agjencive të tjera federale amerikane.
Në kërkim të temës së diplomimit, Page konsideroi- ndër gjërat e tjera – eksplorimin e vetive matematikore të World Wide Web, duke kuptuar strukturën e tij si një grafik të madh. Mbikëqyrësi, Terry Winograd e inkurajoi të zgjedhë këtë ide (të cilën më vonë e kujton si “këshilla më e mirë që kam marrë”), dhe Page u përqëndrua në problemin e gjetjes se cilat faqe interneti mund të lidheshin me një faqe të caktuar, duke marrë parasysh numrin dhe natyrën e këtyre lidhjeve të reja për të qenë një informacion i vlefshëm për atë faqe (duke patur në mendje rolin e citimeve në botimin akademik).
Serveri i Page, filloi të eksplorojë rrjetin në marsin e vitit 1996. Fillimisht motori i kërkimit, përdori faqen e internetit të Universitetit të Stanfordit me domeinin google.stanford.edu. Domeini google.com u regjistrua më 15 shtator 1997. Ata themeluan zyrtarisht kompaninë e tyre, Google Inc, më 4 shtator 1998, në garazhin e shtëpisë së një miku të tij në Menlo Park të Kalifornisë.
Emri “Google”, rrjedh nga një shqiptim i gabuar i termit “googol”, që i referohet numrit të përfaqësuar nga numri 1 dhe i ndjekur nga 100 zero. Duke u përdorur gjithnjë e më shumë në gjuhën e përditshme, folja “google” u shtua në Dictionary Collegiate Merriam Webster dhe Fjalorin e gjuhës angleze të Oksfordit në vitin 2006.
15 shtator 1254 – Lindi eksploratori i famshëm italian Marco Polo
Koha dhe vendi i saktë i lindjes së Marco Polos janë të panjohura, dhe teoritë aktuale janë kryesisht të dyshimta. Megjithatë, data më e cituar është diku “rreth vitit 1254”, ndërsa përgjithësisht pranohet se Polo ka lindur në Republikën Veneciane. Babai i tij, Nicolo, ishte një tregtar që bënte tregtonte me Lindjen e Mesme, duke u pasuar dhe arritur një famë të madhe.
Nicolo dhe vëllai i tij Maffeo, u nisën në një udhëtim tregtar, para se Marco të lindte. Në vitin 1260, vëllezërit banonin në Konstandinopojë, kur parashikuan një ndryshim politik. Për këtë arsye shitën pasuritë e tyre në bizhuteri dhe u larguan. Sipas “Udhëtimeve të Marco Polos”, ata udhëtuan nëpër pjesën më të madhe të Azisë, dhe u takuan me Kublai Khan.
Ndërsa nëna e Marco-s vdiq, ai u rrit nga të afërmit. Polo ishte i arsimuar mirë, dhe mësoi mbi të fshehtat e tregtisë, duke përfshirë edhe valutën e huaj. Ai ndoqi traditën e babait, duke udhëtuar shpesh në Azi, ndërsa qëndroi për disa vite në Kinë.
15 shtator 1935 – Hitleri njofton miratimin e ligjeve të Nurembergut
Ligjet u shpallën në tubimin vjetor të partisë naziste në Nuremberg, duke u bërë të njohura si ligjet e Nurembergut. Të dyja ligjet u improvizuan me nxitim. Ligji i parë, Ligji për Mbrojtjen e Gjakut dhe Nderit gjerman, ndalonte martesat dhe marrëdhëniet jashtëmartesore midis “hebrenjve” (joarianëve) dhe “gjermanëve”, dhe gjithashtu edhe punësimin e femrave “gjermane” nën moshën 45-vjeç në familjet hebraike. Ligji i dytë, Ligji për Shtetësinë e Rajhut, u hiqte hebrenjtë shtetësinë e tyre gjermane, dhe bënte një dallim të ri midis “qytetarëve të Rajhut” dhe “shtetasve” të tjerë.
15 Shtator 1959 – Nikita Hrushov mbërrin në Uashington
Nikita Hrushovi, bëhet udhëheqësi i parë sovjetik që viziton Shtetet e Bashkuara. Gjatë dy javëve që pasuan, vizita e Hrushovit pushtoi titujt kryesorë në mediat e botës, ndërsa ai vetë prodhoi gjatë sundimi të tij disa momente dramatike por dhe humoristike të historisë së Luftës së Ftohtë.
15 Shtator 1914 –Nis në Frontin Perëndimor hapja e transheve të para ushtarake
Pas betejës së Marnës, gjatë së cilës trupat aleate arritën të ndalnin përparimin e vazhdueshëm të gjermanëve përmes Belgjikës dhe Francës, që kishte ndodhur sidomos gjatë muajit të parë të Luftës së Parë Botërore, të dyja kampet filluan të gërmojnë transhetë e para në Frontin Perëndimor. Sistemi i tyre shtrihej nga brigjet e Detit të Veriut në Belgjikë, deri në jug të Francës, me një gjatësi totale prej mbi 35 mijë kilometra. Lufta e transheve do të zgjaste mbi 4 vjet, dhe do të merrte jetën e miliona ushtarëve nga të dyja kampet.
15 Shtator 1963 – Një bombë e Ku Klux Klan vret 4 vajza të reja afro-amerikane
Katër anëtarë të grupit të supremacistëve së bardhë, hodhën një bombë me sahat në Kishën Baptiste XVI, të frekuentuar kryesisht nga zezakët në Birmingam të Alabamas në SHBA. Ky akt shënoi një moment kulmor në përshkallëzimin e Lëvizjes për të Drejtat Civile në Amerikë.
15 shtator 1588 – Armada Spanjolle, e cila u përpoq të pushtonte Anglinë, shkatërrohet nga flota britanike.
15 Shtator 1928 – Bakteriologu skocez, Alexander Fleming, zbulon rastësisht se penicilina që gjendej tek myku, ka një efekt antibiotik.
