Dalin detaje rrëqethëse lidhur me krimin e rëndë që ndodhi dje në Ballsh. Autori i krimit kishte bërtitur para se të vriste gruan dhe kunatën: “Jam unë i zoti i shtëpisë këtu”!
Sherri dyshohet se ndodhi pasi Gramoz Musta pati një debat me të shoqen, të cilën nuk e lejoi të shkonte për vizitë te familjarët e saj.
Pas krimit në familje, vijnë dëshmi tronditëse, ndërsa e gjithë ngjarja ndodhi në prani të dy fëmijëve të mitur të çiftit.
Fqinjët e familjes Musta rrëfejnë për gazetarin Ervis Kuci momentet e para pas ngjarjes kur Gramozi kishte dalë nga shtëpia me dy fëmijët.
“Çfarë i bëre mamit”, mësohet të ketë thënë vajza e çiftit pas krimit, ndërsa më pas ajo është marrë nga i ati se bashku me vëllanë për t’u larguar nga vendngjarja. Policia ka ndaluar 34-vjeçarin menjëherë pas krimit.
Gentiana dhe Merisa Caushi u vranë me thikë nga 34-vjeçari pasditen e djeshme, ndërsa fqinjët konfirmojnë faktin se sherri kishte nisur pasi gruaja donte të ikte tek njerëzit e saj me rastin e Vitit të Ri.
Flet fqinja
Si e more vesh?
Unë nuk kam qenë këtu por dje pasdite dola dhe ai kishte marrë fëmijët dhe fëmijët bërtisnin, ‘çfarë i bëre mamit’. Kaq di.
I mori vetë fëmijët?
Fëmijët i kishte marrë ai. Njërin e kishte në krah dhe vajzën për dore.
Ku i çoi?
Nuk e di, dola nga shtëpia dhe ika.
Sa i njihnit?
Nuk hymë e dalim, nuk i njohim nga afër. Dukej sikur shkonin mirë.
Kishin konflikte, kishit dëgjuar gjë?
Jo, jo. S’kisha dëgjuar gjë. Nuk dimë asgjë.
Ju tronditi kjo ngjarje?
Sigurisht që na tronditi. Ishte ngjarje shumë e rëndë.
Ku i çoi fëmijët pasi i mori?
Djalin e kishte në krahë dhe vajzën për dore. Po dilnin. Mund të ishte ora 17:00. Madje mendova t’i bërtisja se vajza po qante e bërtiste ‘çfarë i bëre mamit’.
Unë këtu i kam parë, kohët e fundit mund të jetë larguar. Nuk i njoh mirë, thjesht banorë të pallatit, një përshëndetje.
Fqinji
E dini çfarë ka ndodhur mes tyre?
Vetëm tani për rastin e Vitit të Ri. Gjoja ishin zënë se do vente nga njerëzit e saj e shoqja.
Si i kishte marrëdhëniet me prindërit e bashkëshortes?
Këtë nuk e di, po këtu shkonin mirë me të shoqen. Nuk kemi dëgjuar konflikte. Vetëm kjo ka qenë arsyeja, gjoja do vente nga i ati ajo, vemi, s’vemi.
