Pas votimit në Kuvend kundër arrestimit të deputetit Saimir Tahiri, menjëherë ka marrë fjalën kryetarja e LSI-së, Monika Kryemadhi, e cila tha se mazhoranca zgjodhi sërish dashurinë për krimin para dashurisë për Shqipërinë.
Sipas saj, ky votim vërtetoi që 74 mandatet e PS janë të blera me paratë e drogës dhe krimit:
“Mendova se mes dashurisë për Shqipërinë dhe dashurisë për krimin, mazhoranca do zgjidhte dashurinë për Shqipërinë, por vesi është më i fortë. Kam votuar pro kërkesës së prokurorisë për të gjithë ata të rinj e të reja
Votimi i sotëm vërtetoi thënien e Habilajve që 74 mandatet e PS janë të blera me paratë e drogës e krimit, pas këtij votimi ky parlament më ngjan si korporata e latifondistëve të hashashit, ku secili mban një parcelë. Jeni peng i krimit dhe trafikut të drogës. Nuk na mbetet më gjë tjetër vetëm t’i themi punë të mbarë të gjitha bandave…”
Pas saj, fjalën e ka marrë deputeti demokrat Enkelejd Alibeaj, i cili tha se votimi sot në Kuvend nuk ishte thjesht për heqjen e imunitetit te Tahirit, por ishte test i trefishtë.
“Sot është një test që s’ka të bëjë fare me heqjen e imunitetit, por test i trefishtë, moral për Tahirin, flamurtar i moralit e transparencës, kishte mundësinë ta bënte, sot e humbi e bashkë me të karrierën politike e 4 -5 vjet eksperiencë politike që pati në këtë Kuvend, ishte test moral për Ramën, që në momentin që mori nën sqetull Saimir Tahirin. Kush fitoi e kush humbi? E sigurt që humbi Rama sot, përveç anktheve e maktheve që e kanë kapluar këto ditë, por që do zgjasin, ishte test moral edhe për deputetët, i keni vendosur njollën më të rëndë karrierës suaj politike që nuk do ta hiqni dot”.
