Ministri i Brendshëm, Fatmir Xhafaj ka folur sot mbi zhvillimet e fundit me ish-ministrin Saimir Tahiri.
Xhafaj nuk përmendi emra konkretë, por foli për trafikantë, prokurorë e gjyqtarë të korruptuar, të cilët duhet të mbajnë përgjegjësi për moskapjen e tyre, ndërsa kritikoi edhe politikanët, të cilët sipas tij, e shohin çështjen e luftës kundër trafikut thjesht e vetëm si trafik karrigesh pushteti.
Xhafaj mori pjesë në një konferencë, ku flitej për trafikun e qenieve njerëzore ku theksoi mes të tjerash se shumëkush mund të flasë për trafikun dhe trafikantët, por harron prokurorët dhe gjyqtarët e korruptuar.
“Të gjithë flasim për trafikun e trafikantët po harrojmë të ngremë zërin e kërkojmë llogari për njerëzit e drejtësisë, për gjyqtarët dhe prokurorët e korruptuar që në vite kanë ridënuar apo rivrarë viktimat për tju shpëtuar burgun lloj – lloj trafikantëve që sot shëtisin lirshëm pasi kanë fituar imunitetin prej drejtësisë së korruptuar.
Synojmë më shumë bashkërendim dhe koordinim mes gjithë agjencive, qendrore dhe lokale. Ne do të vazhdojmë ta bëjmë këtë luftë me përkushtim.
Edhe sepse një gjë e tillë nuk është fort e lehtë në kushtet e një trafiku të madh të fjalës pa fre, të retorikës boshe, akuzave për përbaltje, delirimit pa kufij. Fjalime të tëra, deklarata patetike, emisione e shkrime pafund adresohen për trafikun dhe trafikantët, emrat e të cilëve janë temë e ditës.
Ndërkohë që do të duhej të flisnim e debatonim parasëgjithash për thelbin e problemit, për mënyrën se si të përballemi me dukuri të tilla, që janë cdo ditë e më shumë transnacionale, pa ngjyrë e pa parti.
Të flisnin shumë më pak disa nga politikanët në rolin butaforik të prokurorit e policit, që cështjen e luftës kundër trafikut e shohin thjesht e vetëm si trafik karrigesh pushteti, për tju dhënë mundësinë të veprojnë ata që e kanë më së shumti këtë përgjegjësi – njerëzit e ligjit, gjyqtarët, prokurorët dhe policët”, tha Xhafaj.
Këtë deklaratë Xhafaj e bëri pas zhvillimeve të bujshme, ku përmendet Tahiri si i përfshirë në një trafik droge.
