Në mbledhjen e Këshillit të Mandateve, Alibeaj u ka bërë thirrje kolegëve që të mos e tejkalojnë cakun me pyetjet.
Alibeaj iu referua Manjës, teksa tha se duhet të jemi seriozë dhe u bëri thirrje të mos bëjnë avokatin e Tahirit. Fjalën e mori Ruçi, i cili mbrojti Manjën teksa tha se nuk i mohohen pyetjet, dhe se është detyra e Prokurorit të zgjedhë të përgjigjet ose jo.
REPLIKAT:
Hajdarmataj: Në 19/10/2017 kemi një material në gjuhën italiane, ne po vazhdojmë përkthimin e tij, kemi përkthyer pjesën ku implikohet deputeti Tahiri, ka shumë emra të tjerë të përfolur në këtë aktivitet.
Materiali ka ardhur nga Prokuroria e Përgjithshme.
Alibeaj: Duhet të keni parasysh disa limite ligjore. Kolegu futet në themel të çështjes, sa dokumente ka? A ka ndjekur procedurën e letër porosive etj etj. Ju kujtoj se kjo çështje diskutohet në gjykatë, këtu shqyrtohet vetëm një gjë: a ka një kërkesë drejtuar kuvendit? A ka nisur një procedim penal? A i është bërë e ditur palës tjetër ky material? Çështja e futjes në themel është një tejkalim. Duhet të jemi seriozë me rregulloren dhe kushtetutën. Tendenca për të kërkuar ngërçet procedurale, besoj që është ndërhyrje në punët e prokurorisë. Për fytyrën e parlamentit, është e hijshme mos ta kalojmë këtë.
Ruçi: Askujt nuk i mohohet e drejta e pyetjes, brenda problemit. Prokurori është më i aftë se ju dhe mua, përgjigjet ai.
Alibeaj: Po bëni avokatin e Saimir Tahirit.
