Përjashtimi i Skënderbeut nga kompeticionet e organizuara nga UEFA me 10 vite ka bërë bujë të madhe. Pothuajse të gjitha mediat prestigjioze i kanë kushtuar vëmendje këtij skandali të mundshëm, që në rast se vërtetohet do të jetë si më i rëndi në histori.
Federbet, kompania që monitoron luhatjen e çuditshme të koeficienteve, nuk mund të mungonte pa bërë një reagim, pasi këta të fundit para dy vitesh kishin akuzuar Skënderbeun për trukim. Ishte kjo kompani që hodhi dritë e para, mbi dyshimet për fiksim të rezultateve nga skuadra korçare. Federbet sjell në kujtesë denoncimin e bërë në 11 dhjeto të vitit 2015.
“Më shumë se dy vjet më parë, vendosëm të hidhnim dritë në lëvizje të çuditeshe lidhur me ndeshet e Skënderbeut. Kemi marrë shumë kërcënime, fyerje dhe kritika të mëdha. Në distancë prej 28 muajsh UEFA po kërkon një skualifikim të gjatë për ekipin shqiptar.
Ne e përsërisim tani atë që kemi thënë në atë kohë. Heshtja është karburant për zjarrin e ndeshjeve të fiksuara. Mund ta quani padi, mund ta quajmë shqetësim por jemi të sigurt se pa thirrjet tona, asgjë nuk do të kishte lëvizur“, shkruan Federbet.
