Është zhvilluar sot seanca për çështjen “Shullazi” në Gjykatën e Krimeve të Rënda. Sot kanë dëshmuar me radhë rektori i UT Mynyr Koni, ministrja e Arsimit Lindita Nikolla dhe ish drejtori i Policisë së Tiranës, Ervin Hodaj.
Ndërkohë janë zbardhur edhe dëshmitë e secilit prej dëshmitarëve. Rektori Koni ka rrëfyer se si ka ndodhur ngjarja, ndërsa ka theksuar se në momentin e kërcënimit ka qenë errësirë dhe nuk ka arritur të dallojë personin që i ka kërkuar të tërhiqet.
“Në momentin e kërcënimit kam qenë para Fakultetit të Shkencave. Më thirrën nga një makinë e zezë dhe më thanë që të futesha brenda. U futa në makinë dhe u ula pas. Më kërkuan të hiqja dorë nga gara. Kërkesa ishte në mënyrë ultimative. Në momentin e parë nuk e kuptova se çfarë ndodhi. Isha i tronditur. Anulova garën zgjedhore. Kontaktova vetëm me Dhori Kulen dhe i tregova ngjarjen. Kam paraqitur dhe dorëheqjen, pastaj iu riktheva garës”, deklaroi Koni.
Ai po ashtu ka deklaruar në seancë se Ministri i Brendshëm i ka garantuar sigurinë.
Ndërkohë, gjatë dëshmisë, Shullazi e ka pyetur drejtpërdrejt Konin, nëse i ngjante fytyra e tij me personin që e kishte kërcënuar.
“A të ngjaj unë me ata që të kërcënuan?”, ka thënë Shullazi, ndërsa Koni është përgjigjur:
“Të kam parë aq shumë në TV sa nuk e përcaktoj dot. Ishte shumë errësirë, nuk kujtoj gjë…”
“Po mirë, pse u ndjeve i kërcënuar ti, unë i them 100 herë drejtorit të burgut të japë dorëheqjen, ai nuk ndihet i kërcënuar”, ka replikuar Shullazi.
Ndërkohë, ministrja e Arsimit, Lindita Nikolla ka nxjerrë “blof” ministrin Tahiri, teksa ky i fundit dëshmoi se lajmin për kërcënimin e Konit e kishte mësuar nëpërmjet publikimit të Berishës.
“Ishte Majlind Keta që më njoftoi për ngjarjen. Mora në telefon zotin Kule dhe më shpjegoi lidhur me kërcënimin ndaj Konit dhe ndaj tij. Kam kërkuar takim me zotin Çako dhe menjëherë ai më la takim tek Garda. Aty erdhi dhe ministri Tahiri, Kule, Hodaj. Ndërsa ishim në takim me Tahirin, Berisha doli në konferencë për shtyp dhe dha detaje nga kërcënimi”, kështu mësohet të jetë shprehur Nikolla, shkruan ‘Balkanweb’.
Para pak ditësh, ish-ministri Tahiri dha një version tjetër, teksa pohoi se ngjarjen e kishte marrë vesh në media, ku ish-kryeministri Sali Berisha denoncoi publikisht kërcënimin që kishte marrë Koni nga Shullazi si dhe tërheqjen e tij nga gara.
“Ngjarjen në fjalë e kam marrë vesh nga denoncimi publik i bërë nga ish-kryeministri Sali Berisha në konferencën për mediat”, dëshmoi Tahiri.
Një përplasje ka pasur edhe mes Shullazit e ish-drejtorit të Policisë së Tiranës, Hodaj teksa ky i pari ka kërkuar llogari se mbi çfarë provash është shoqëruar dhe kush ia ka dhënë emrin e tij.
“Më jep shpjegim mbi c’prova jam shoqëruar dhe kush ta ka dhëne emrin tim, ta kanë dhënë profesorët. Pse kushdo që mund të akuzojë dikë mund të shkojë në burg?” tha Shullazi. Por nga ana e tij Hodaj tha se ka zbatuar rregullat dhe ligjin.
“Jam telefonuar nga Haki Cako dhe aty kam gjetur rektorin e kohës, Dhori Kule. Më është ngarkuar të shkoj tek Mynyr Koni për të marrë kontakt. Kur shkova ai ishte i tronditur. E shoqërova me makinën time në gardën e republikës. Më pas Koni është shoqëruar në komisariat ku ka bërë edhe kallëzimin për kërcënimin”, tha Hodaj.
Kule mohoi të ketë pasur komunikim me Berishën pas kërcënimit./ Tirana Today
