Panos Kammenos, Ministri grek i Mbrojtjes i është përgjigjur Kryeministrit të Shqipërisë Edi Rama duke thënë se Shqipëria ka ende çështje të pazgjidhura me Greqinë.
Kreu i koalicionit të djathtë, njëkohësisht ministër i Mbrojtjes, u shpreh gjatë një konference për shtyp në Selanik se autoritetet shqiptare nuk po zbatojnë Nenin 49 të Bashkimit Evropian, i cili thekson se: “Bashkimi bazohet në vlerat e respektit për dinjitetin njerëzor, lirinë, demokracinë, barazinë, sundimin e ligjit dhe respektimin e të drejtave të njeriut, duke përfshirë të drejtat minoriteteve”.
Zyrtari grek paralajmëroi zyrtarët shqiptarë se pretendimi i shkeljes së të drejtave të pakicave greke në Himarë mund të ketë pasoja në pranimin e Shqipërisë në BE.
Në të vërtetë, në Himarë nuk ka pakica greke. Kammenos i referohet shqiptarëve që flasin greqisht ose atyre që punojnë në Greqi si emigrantë.
Kommenos shprehu shqetësimin e tij për politikën e jashtme të Shqipërisë dhe tha se qasja ekstremiste në politikën rajonale mund të pengojë zhvillimin e marrëdhënieve të mira me fqinjët jugorë.
“Ne nuk i trembemi askujt, pavarësisht nëse kanë fuqi ushtarake apo jo. Ne nuk duam që fqinjët tanë të udhëhiqen nga ekstremistë, por nga udhëheqës modernë të cilët mund të krijojnë klimën e sigurisë dhe të mund të zhvillojnë rajonin”, tha Kammenos.
Kammenos foli indirekt edhe për marrëdhënien Shqipëri-Turqi, ku shprehu shqetësimin e tij se lidershipi aktual shqiptar mund të mbështesë “ekstremistët” dhe ndoshta mund ta përdorë Turqinë si një mburojë mbrojtëse.
Duke shprehur nevojën për një udhëheqje të moderuar, Kammenos tha se kryeministri i mëparshëm Berisha ka bashkëpunuar me Greqinë gjatë mandatit të tij.
Në vitin 2009, Berisha nënshkroi një traktat duke i dhënë Greqisë një zonë detare në Marrëveshjen e Detit të Jonit të vitit 2009. Kjo marrëveshje u deklarua jo kushtetuese nga Gjykata Kushtetuese Shqiptare në vitin 2015.
TIRANA TODAY
