Komedia “Celulë seksuale” vjen në Teatrin Kombëtar Eksperimental “Kujtim Spahivogli” te “ArTurbina” në muajin mars dhe prill.
Shfaqja teatrore shënon premierën mbrëmjen e datës 24 mars, për të vijuar me netë të tjera. Komedia “Celulë seksuale” është cilësuar nga autorja e saj A. Longaretti si komedi e hidhur.
Në vepër interpretojnë Naum Shundi, Shegushe Bebeti, Delinda Disha, Jorida Meta dhe Françeska Hysi. Në ngjarje bëjnë pjesë katër gra, me mosha të ndryshme të cilat janë operatore telefonike dhe shesin lodra seksi.
Përgjatë dialogjeve ato shpalosin marrëdhëniet midis tyre, jetën e përditshme, dashuritë dhe urrejtjet, dramat dhe pasionet. Kjo pjesë është një nga veprat më të suksesshme të dramaturgjisë bashkëkohore.
Katër personazhet përfaqësojnë interesa, dëshira, halle, problematika të ndryshme në varësi të moshës. Ato e përcaktojnë të qënit grua, nënë si një gardiane e familjes, e fëmijëve dhe e së ardhmes. Detyra e tyre është të ruajnë çfarë kanë më të shtrenjtë.
