Kundërshtarët e radhës për Skënderbeun në Europa League do të jenë çekët e Mllada Boleslav. Ata kaluan në turin e tretë të Europa League pasi mundën Shemrok Rovers në të dyja ndeshjet, me protagonistë dy sulmuesit Jan Shramosta dhe Golgol Mebrahtu. Ata realizuan 5 gola duke siguruar përballjen me korçaret në turin tjetër.
“Deri tani kemi qenë të suksesshëm, shifrat flasin vetë. Mendoj se kemi kënaqur zemrat e tifozëve tanë sidomos me golin e dytë në ndeshjen e kthimit. Ndoshta nuk sulmuam aq shumë në pjesën e dytë, por morëm çfarë deshëm, sepse fituam 2-0 dhe u tërhoqëm, meqë atyre u duheshin tre gola”, tha 26-vjeçari Shramosta.
Ai e ka cilësuar Skënderbeun më të lehtë se Kairati.
“Unë kisha më shumë dëshirë që të kalonin shqiptarët, pasi është një udhëtim më i shkurtër për të shkuar atje për ne. Gjithashtu, edhe pse i mendoj si kundërshtar më i lehtë, ndonëse në Europë nuk mund të zgjedhësh ata që ke përballë”, tha Shramosta, për mediat çeke.
Sikurse nënvlerëson sot Skënderbeun, Mllada deklaroi të njëjtën gjë vitin e kaluar edhe për Shkëndijën e Tetovës, nga e cila u mund.
